निष्पक्ष र विश्वसनीय खबरको सँगालो 
Khabar Punja
३ आश्विन २०८१, शुक्रबार
तनहुँ : तनहुँकाे म्याग्दे गाउँपालिकाले भदौ १७ गतेसम्म लकडाउन लम्ब्याएको छ । बिहीबार मात्रै म्याग्दे गाउँपालिकाका ८ जनामा कोरोना सङ्क्रमण पुष्टि भएपछि गाउँपालिकाले भदौ १७ गते राति १२ बजेसम्मलाई लकडाउन लम्ब्याउने निर्णय गरेको हो ।
बिहीबार कोरोना सङ्क्रमण पुष्टि भएकाहरुबाट कन्ट्याक्ट ट्रेसिङ शुरु भइसकेको र ट्रेसिङमा परेकाहरुको पिसीआर परीक्षणका लागि स्वाब सङ्कलन गरिने गाउँपालिकाका प्रमुख प्रशासकीय अधिकृत हरि नागिलाले जानकारी दिनुभयो । “कोरोनाको जोखिम कायमै रहेकाले लकडाउन लम्ब्याउने निर्णय भएको हो,” नागिलाले भन्नुभयो ।
म्याग्दे गाउँपालिकाका अध्यक्ष मायादेवी रानाले लकडाउनको पूर्ण पालना गर्न र अनावश्यक रुपमा हिँडडुल नगर्न आग्रह गर्नुभएको छ ।
बिहीबार म्याग्दे गाउँपालिका–४ का ३४, ६२, म्याग्दे गाउँपालिका–६ का ५८, ५३, म्याग्दे गाउँपालिका–७ का ३५ र ३७ वर्षीय पुरुष, एक वर्षीय बालक र ३१ वर्षीया महिलामा कोरोना पुष्टि भएको थियो । कोरोना पुष्टि हुनेमध्ये एक जना प्रहरी, ६ जना भारतबाट आएर होम क्वारेन्टिनमा बसेका र एक जना म्याग्दे गाउँपालिका–७ घर भई हाल व्यास नगरपालिका–३ शान्तिनगर बस्ने पुरुष रहेका छन् ।
लकडाउन अवधिभर गाउँपालिकामा अत्यावश्यक बाहेकका सबै क्षेत्र बन्द रहनेछन् ।
