निष्पक्ष र विश्वसनीय खबरको सँगालो 
Khabar Punja
५ मंसिर २०८१, बिहीबार
तनहुँ : तनहुँको व्यास नगरपालिकाले लकडाउन हटाउने निर्णय गरेको छ । नगर प्रमुख बैकुण्ठ न्यौपानेको अध्यक्षतामा शुक्रबार बसेको सर्वपक्षीय बैठकले नगरपालिकामा शनिबारदेखि लकडाउन हटाउने निर्णय गरेको हो ।
यसअघि नगरपालिकाको सिफारिसमा जिल्ला प्रशासन कार्यालय तनहँुले भदौ १ गतेदेखि भदौ ७ गतेसम्म निषेधाज्ञा जारी गरेको थियो भने नगरपालिकाले थप पाँच दिन लकडाउन गर्ने निर्णय गरेको थियो ।
बैठकले बिहान ८ बजेदेखि साँझ ६ बजेसम्म बजार खुल्ला गर्ने निर्णय गरेको प्रमुख प्रशासकीय अधिकृत डिल्लीराम सिग्देलले जानकारी दिनुभयो । तर २० गतेसम्म सार्वजनिक यातायात, होटल रेष्टुरेण्ट, जिम हाउस, सैलुन, व्युटीपार्लर बन्द रहनेछन् ।
बैठकले बैंक तथा वित्तीय संस्थाहरु दिवा समयमा बिहान ११ बजेदेखि ३ बजेसम्म स्वास्थ्य सुरक्षा मापदण्ड अपनाई, भौतिक दूरी कायम गरी सञ्चालन गर्न अनुरोध गरेको छ । तनहुँ उद्योग वाणिज्य सङ्घ दमौली बजार इकाई सभापति राजकुमार श्रेष्ठ (राकु) ले स्वास्थ्य सुरक्षाको मापदण्ड अपनाएर व्यवसाय सञ्चालन गर्न व्यवसायीलाई आग्रह गरिएको बताउनुभयो ।
