निष्पक्ष र विश्वसनीय खबरको सँगालो 
Khabar Punja
१० मंसिर २०८१, मंगलवार
तनहुँ : तनहुँमा बुधबार ११ कोरोना सङ्क्रमित निको भएर घर फर्किएका छन् । भानु नगरपालिका–१ का ८ जना पुरुष र ३ जना महिला कोरोना जितेर फर्किएका हुन् ।
शुक्लागण्डकी नगरपालिकास्थित जिपी कोइराला राष्ट्रिय श्वासप्रश्वास उपचार केन्द्रको आइसोलेशनमा उपचाररत २२, २७, ३०, ३७, ४०, ५०, ५३ र ५९ वर्षका पुरुष, ३० र ५६ वर्षीया महिला र ५ वर्षीया बालिका बुधबार डिस्चार्ज भएको अस्पतालले जानकारी दिएको छ । तीमध्ये ३० र ३१ गते आइसोलेशनमा ल्याइएका ५÷५ जना र ३२ गते ल्याइएका एक जना रहेका छन् । योसँगै तनहुँ जिल्लामा कोरोना निको हुनेको सङ्ख्या २ सय ११ पुगेको छ ।
तनहुँमा अब सक्रिय सङ्क्रमित ७२ जना रहेको स्वास्थ्य कार्यालयका प्रमुख शङ्करबाबु अधिकारीले जानकारी दिनुभयो । उहाँका अनुसार भानु नगरपालिकाका ४०, व्यास नगरपालिकाका ९, शुक्लागण्डकी नगरपालिकाका ७, भीमाद नगरपालिकाका एक, म्याग्दे गाउँपालिकाका ८, देवघाट गाउँपालिकाका दुई, बन्दीपुर गाउँपालिकाका तीन र आँबुखैरेनी गाउँपालिकाका दुई सङ्क्रमितको विभिन्न आइसोलेशन कक्षमा उपचार भइरहेको छ ।
यस्तै बुधबार तनहुँमा तीन जना सङ्क्रमित थपिएका छन् । शुक्लागण्डकी नगरपालिका स्थायी ठेगाना भएका दुई र व्यास नगरपालिकाका एक जना सङ्क्रमित भएको स्वास्थ्य निर्देशनालयले जनाएको छ ।
