निष्पक्ष र विश्वसनीय खबरको सँगालो 
Khabar Punja
७ जेष्ठ २०८१, सोमबार
तनहुँ : पृथ्वीराजमार्ग अन्तर्गत तनहुँको आँबुखैरेनी–मुग्लिङ सडकखण्ड विगत एक हप्तादेखि एकतर्फी रुपमा सञ्चालन भइरहेको छ । सुख्खा पहिरा खसेर गत शुक्रबार अवरुद्ध भएको राजमार्ग सोही दिनदेखि एकतर्फी रुपमा सञ्चालनमा छ ।
आँबुखैरेनी गाउँपालिका–२ ऐनापहरा नजिक खसेको पहिरा पन्छाएर राजमार्ग एकतर्फी गराइएको भएपनि ठूला ढुङ्गा हटाउन समय लागेको जिल्ला प्रहरी कार्यालय तनहुँले जनाएको छ । आज बिहानदेखि ठूला ढुङ्गा हटाउन एक्साभेटर प्रयोग गरिएको जिल्ला प्रहरी कार्यालय तनहुँका प्रहरी नायब उपरिक्षक युवराज तिमिल्सिनाले जानकारी दिनुभयो । “पहिरा हटाएर आजै राजमार्ग दुईतर्फी रुपमा सञ्चालनमा ल्याउने तयारी छ,” उहाँले भन्नुभयो, “एक्साभेटर प्रयोग गरी ढुङ्गा हटाउने काम भइरहेको छ ।”
आँबुखैरेनी–मुग्लिङ सडकखण्ड अन्तर्गत उक्त ठाउँमा बेला–बेलामा पहिरा गएर राजमार्ग अवरुद्ध हुने गरेको छ । वर्षा नभएको बेलामा पनि यहाँ सुख्खा पहिराको समस्या रहँदै आएको छ । कोत्रेदेखि मुग्लिङ खण्ड अन्तर्गत तनहुँको ७२ किमि राजमार्गमा सबैभन्दा बढी पहिरा जाने ठाउँ नै यही हो ।
तस्वीर : बादल थकाली
