Khabar Punja

तनहुँ : तनहुँको व्यास नगरपालिका–५ वेनीपाटनमा जारी तनहुँ क्रिकेट कपको तेस्रो दिन सोमबार भएको खेलमा मनकामना र एन्जल्स क्लव विजयी भएको छ । परिवर्तन नेपालको आयोजनामा जारी प्रतियोगिता अन्तर्गत सोमबार मनकामना र पेलिसियन्स क्लवबीच भएको खेलमा मनकामना तथा एन्जल्स र वैरेनीबीच भएको दोस्रो खेलमा एन्जल्स विजयी भएको हो ।

मनकामना क्लव पेलिसियन्स विरुद्ध २४ रनले विजयी भएको आयोजकले जनाएको छ । उक्त खेलमा राजकुमार म्यान अफ दि म्याच हुन सफल हुनुभएको छ । त्यस्तै एन्जल्स र वैरेनीबीच भएको खेलमा एन्जल्स विजयी भएको छ । एन्जल्सले एक सय ७३ रनको लक्ष्य दिएकामा वैरेनीले ८५ रनमात्रै जोडेको थियो । उक्त खेलमा युवराज खत्री म्यान अफ दि म्याच घोषित हुनुभयो ।

प्रतियोगितामा विजेतालाई रु ६० हजार र उपविजेतालाई रु ३० हजार नगद प्रदान गरिने परिवर्तन नेपालका अध्यक्ष प्रविण पौडेलले जानकारी दिनुभयो । साथै म्यान अफ दि म्याच र म्यान अफ दि सिरिजलाई पनि पुरस्कार प्रदान गरिनेछ । प्रतियोगितामा तनहुँका पाँच र काठमाडौको एक टिमको सहभागिता छ । प्रतियोगिता १९ गतेसम्म सञ्चालन हुनेछ ।