निष्पक्ष र विश्वसनीय खबरको सँगालो 
Khabar Punja
९ मंसिर २०८१, सोमबार
तनहुँ : महाशिवरात्री तथा सेना दिवसको अवसरमा तनहुँको शुक्लागण्डकी नगरपालिका खैरेनीटारस्थित श्री नं ३ बाहिनी अड्डामा मङ्गलबार फुटबल र डोरी तान प्रतियोगिता सम्पन्न भएको छ । नेपाली सेनाको अधिकृत तथा खैरेनीटारका व्यवसायीबीच भएको फुटबल प्रतियोगितामा नेपाली सेनाको टोली विजयी भएको छ ।
निकै प्रतिस्पर्धात्मक रुपमा भएको खेलमा सेनाको टोली ६–४ गोल अन्तरले विजयी भएको हो । पहिलो हाफसम्म दुवै टिमबाट तीन÷तीन गोल भएकामा दोस्रो हाफमा सेनाले थप तीन गोल गरेको थियो भने व्यवसायीको तर्फबाट एक गोल भएको थियो ।
प्रतियोगितामा विजेता टिमले नगद रु १५ हजारका साथै खसी प्राप्त गरेको छ । विजयी टिमलाई शुक्लागण्डकी नगरपालिकाका प्रमुख किसान गुरुङ, श्री नं ३ बाहिनी अड्डाका बाहिनीपति सहायकरथी कुमारबाबु थापा लगायतले पुरस्कार वितरण गर्नुभयो ।
डोरी तानमा महिला सिपाही विजयी
दिवसकै अवसरमा बाहिनी अड्डाका महिला सेनाबीच भएको डोरी तान प्रतियोगितामा महिला सिपाही विजयी भएका छन् । महिला सिपाहीले महिला बिल्लादारलाई डोरी तानमा पराजित गरेका हुन् । यसैबीच सेना दिवसकै अवसरमा आज श्री नं ३ बाहिनी अड्डाले दौड प्रतियोगिता आयोजना गर्दैछ ।
