Khabar Punja

तनहुँ : महाशिवरात्रिका अवसरमा बिहीबार बिहानैदेखि तनहुँका विभिन्न ठाउँका शिव मन्दिरमा भक्तजनकाे भीड लागेकाे छ ।

व्यास नगरपालिका-३ स्थित शिवपञ्चायन मन्दिर, दुर्गा मन्दिर, व्यास नगरपालिका-५ पाटनस्थित शिव मन्दिरमा पूजाआजा तथा दूध चढाउनका लागि बिहानैदेखि भक्तजन भीड लागेकाे हाे । त्यस्तै शुक्लागण्डकी नगरपालिका-२ गाछेपानीस्थित मुक्तिनाथ च्वयनधाममा पनि भक्तजनकाे भीडभाड छ । साथै जिल्लाका अन्य ठाउँमा रहेकाे शिवालयमा पनि भक्तजनकाे उल्लेख्य उपस्थिति छ ।

प्रत्येक वर्ष फाल्गुन कृष्ण चतुर्दशी मध्यरातमा पर्ने दिन मनाइने महाशिवरात्रि पर्व भगवान् शिवलाई खुशी पार्ने विशेष दिन हो । बिहीबार दिउँसो २ः५२ बजेसम्म त्रयोदशी तिथि छ । त्यसपछि चतुर्दशी प्रारम्भ हुन्छ । चतुर्दशी तिथि शुक्रबार दिउँसो २ः५१ बजेसम्म छ । मध्यरातमा चतुर्दशी तिथि बिहीबार परेकाले यसै दिन महाशिवरात्रि पर्व मनाउने निर्णय गरिएको नेपाल पञ्चाङ्ग निर्णायक समितिले जनाएको छ ।