निष्पक्ष र विश्वसनीय खबरको सँगालो 
Khabar Punja
१६ माघ २०८१, बिहीबार
दमाैली : सदरमुकामस्थित दमौली अस्पतालमा भर्ना भएका कोरोना सङ्क्रमितमध्ये गम्भीर प्रकृतिका सङ्क्रमितलाई सघन उपचार कक्षबाट उपचार सेवा शुरु गरिएको छ । कोरोना सङ्क्रमण भएर अस्पताल भर्ना भएका दुई जनालाई अस्पतालले सघन उपचार कक्षबाट उपचार शुरु गरेको हो ।
स्वास्थ्यमा समस्या देखिएपछि दुई सङ्क्रमितलाई सघन उपचार कक्षमा सारेर उपचार गरिएको अस्पतालका मेडिकल सुपरिटेण्डेट डा. सुनिल पौडेलले जानकारी दिनुभयो । “अस्पतालमा भएका जनशक्तिबाटै उहाँहरुको उपचार भइरहेको छ, शुरुमा अलिकति स्वास्थ्य समस्या देखिएको थियो, विस्तारै सुधार हुँदैछ,” डा. पौडेलले भन्नुभयो ।
डा. पौडेलका अनुसार सामान्य कक्ष भन्दा सघन उपचार कक्षमा विशेष प्रकारको उपचार गरिन्छ । सघन उपचार कक्षमा मनिटर, शय्या र प्रविधि फरक हुनुुका साथै हेरचाह पनि बढी हुने उहाँले जानकारी दिनुभयो । सघन उपचार कक्षमा उपचाररत सङ्क्रमितमा अक्सिजनको मात्रा पनि सुधार आएको छ ।
अस्पतालमा हाल कोभिड कक्षमा २० र सघन उपचार कक्षमा दुई गरी २२ सङ्क्रमितको उपचार भइरहेको छ । अस्पतालमा हाल पाँच शय्या खाली छ । अस्पतालबाट गम्भीर प्रकृतिका ३५ जना सङ्क्रमित निको भएर घर फर्किएका छन् ।
