निष्पक्ष र विश्वसनीय खबरको सँगालो 
Khabar Punja
१५ मंसिर २०८१, आईतवार
दमौली : व्यास नगरपालिकाले स्थापना गर्न लागेको समता विद्यालय सञ्चालनको तयारी शुरु भएको छ । नगरपालिकाले आर्थिक वर्ष ०७८/७९ को बजेट मार्फत् व्यास-७ शेषमटारमा समता विद्यालय स्थापना गर्ने निर्णय गरेको थियो ।
अनाथ, असहाय बालबालिका पढाउन नगरपालिकाले आवासीय विद्यालय स्थापनाको तयारी गरेको हो । त्यसका लागि एक करोड बजेट विनियोजन गरेको छ ।
विद्यालय स्थापनाका लागि नगरप्रमुख वैकुण्ठ न्यौपाने सहित जनप्रतिनिधिले मंगलबार शेषमटारमा रहेका पुरानो संरचनाको निरीक्षण गरेका छन् । उक्त ठाउँमा आवासीय विद्यालय स्थापनाका लागि नयॉ संरचना समेत निर्माण गरिने वडाध्यक्ष शतिशचन्द्र न्यौपानेले जानकारी दिए । “विद्यालय स्थापनाको तयारी शुरु भएको छ,” न्यौपानेले भने ।
नगरभित्र माध्यमिक तहसम्मको शिक्षा लिन कठिनाई परेका अनाथ, असहाय, विपन्न, शहीद, बेपत्ता, कोरोनाबाट मृत्यु भएका घरपरिवारका बालबालिकाको शिक्षाका लागि नगरपालिकाले नगर समता विद्यालय स्थापनाको प्रकृया अगाडी बढाएको हो ।
क्यामिन कोट प्राथमिक विद्यालय रहेको ठाउँमा आवासीय विद्यालय स्थापना गर्न लागिएको हो । यो विद्यालय अन्यत्रै स्थानान्तरण भइसकेको छ ।
