Khabar Punja

दुलेगौडा : खैरेनीटार–भिमाद सडकको ठाउँ–ठाउँमा कालोपत्रे उप्किएर ठुल्ठुला खाल्डा बनेको छ । खाल्डामा वर्षाको पानी जम्दा पोखरी जस्तै देखिन्छ ।

शुक्लागण्डकी नगरपालिका–७ स्याउलीबजार र म्याग्दे गाउँपालिका–५ थाङ्दीदेखि भिमादको पुलसम्म दुरावस्था छ । कतिपय स्थानमा सडकको कालोपत्रे देख्नै मुस्किल हुन्छ । भिमाद नगरपालिकाको प्रवेशद्धारमा खाल्टाखुल्टी छन् । यो वर्ष उच्च वर्षा हुदाँ झन् पहिरोको जोखिम पनि बढेको छ ।

सडक साँघुरो हुँदा दुर्घटनाको जोखिम पहिल्यैदखि नै थियो । अहिले सडकमा ठुल्ठुला खाल्डा र पहिरोले झनै दुर्घटनाको जोखिम बढाएको छ । कालोपत्रे गरिएको यो सडक खण्ड छिचोल्न सवारी चालक र यात्रुलाई विघ्न सास्ती हुन्छ । ग्रामीण सडकमा भन्दा बढी सास्ती छ ।

‘खाल्डाखुल्डीले बाटो छिचोल्न साह्रै अप्ठ्यारो हुन्छ । पहिलाभन्दा धेरै समय लाग्ने भएको छ । गाडीको मर्मत खर्च पनि बढाएको छ यो बाटोले’, भिमाद बजारका गणेश सुवेदीले भने । वर्षा लागेपछि झन् पहिरो त्रहीत्रहीमा बाटो काट्नुपरेको उनले बताए । वर्षेनी यो सडक भत्कने समस्या रहेपछि टालटालु बाहेक दिर्घकालीन उपाय नअपनाईने उनको भनाई छ । यो सडकको विकल्प अरु सडक नभएकाले पनि गुणस्तरीय मर्मतमा ध्यान दिनुपर्ने उनी बताउँछन् ।

सडकको दुरावस्थाले पानी पर्दा जलमग्न र घाम लाग्दाको बखत बुङबुङ्ती धुलो उड्ने समस्याले सडक आसपासका बासिन्दालाई पनि आजित बनाएको छ । सडकको अवस्थाबारे जानकार भएपनि गाउँपालिकाको क्षेत्राधिकारमा नपर्ने हुदाँ मर्मत गर्न नसकिएको म्याग्दे गाउँपालिका–५ का वडाध्यक्ष शिवबहादुर आले बताउँछन् । उनी भन्छन्, ‘सडकको हालत खराब छ । मर्मत गर्न गाउँपालिकाको क्षेत्राधिकारमा पर्दैन् । सडक डिभिजनले हेर्ने सडक हो । मर्मतका लागि टेन्डर भएको सुनेको छु । असारबाट बन्छ भनिएको थियो । कहिले बन्ने हो अत्तोपत्तो छैन् ।’ जनताले सडक कहिले बन्छ भनेर बारम्बार सोध्ने गरेको उनले सुनाए । सडक कहिले मर्मत हुन्छ भन्नेबारे आफू पनि अनविज्ञ रहेको वडाध्यक्ष आलेले बताए ।

खैरेनीटार–भिमाद सडक स्तरोन्नति सहित कालोपत्रेका लागी ठेक्का सम्झौता भईसकेको सडक डिभिजन कार्यालय दमौलीका सुचना अधिकारी ईञ्जिनियर नारायण पौडेलले बताए । उनले भने, ‘वैशाखमा ठेक्का सम्झौता भएको हो । ठेक्का लाग्नेवित्तिकै कोरोनाको बेला भएर काम शुरु भएन् । अहिले वर्षामा कटिङ गरेर सडक चौडा बनाउँदा झन् हिलो हुने भएकाले काम शुरु नभएको हो । वर्षा सकिएपछि काम शुरु हुनेछ ।’

खैरेनीटार–भिमाद–भुमरीघाट–कावासोती सडक स्तरोन्नतिका लागि एमएस महालक्ष्मी हिमाली जेभी काठमाडौँले ठेक्का पाएको हो । ७ करोड ४५ लाख २१ हजार रुपैयाँमा ठेक्का लगाईएको सडक डिभिजन कार्यालय दमौलीले जानकारी दिएको छ । गत वैशाख १३ गते ठेक्का सम्झौता भएकोमा २०७९ कार्तिक १३ गतेसम्पन्न गर्नुपर्ने म्याद तोकिएको छ ।

तनहुँको भिमाद नगरपालिका, म्याग्दे गाउँपालिका, ऋषिङ गाउँपालिका र घिरिङ गाउँपालिकाको प्रमुख सडक हो । यही सडक हुदैँ नवलपुर, पाल्पा र स्याङजासम्मका सवारी र यात्रु आवतजावत गर्छन् ।