निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
तनहुँ : कोभिड–१९ बाट उत्पन्न परिस्थितिले सुस्ताएको फिल्म निर्माण कार्य गतिशिल बन्दै जान थालेको छ । तनहुँको भिमाद जन्मघर भई हाल अमेरिकामा बस्दै आएका व्यास बिस्सुले फिल्मको सुटिङ निर्माण कार्यलाई तीव्र रुपमा अगाडी बढाएका हुन् ।
‘लाइभ इन एलए’ नामक चलचित्रको छायाङ्कन कार्य अघि बढेपछि कोरोना र निषेधाज्ञाले बेरोजगार बनेका चलचित्रकर्मीले राहत महशुस गर्न थालेका छन् । कोरोनाको जोखिमका बीचमा पनि बिस्सुले छायाङ्कनलाई अगाडी बढाएका छन् ।
विश्वव्यापीरुपमा फैलिएको कोरोना भाइरसको सम्भावित सङ्क्रमणलाई ध्यानमा राखेर गरिएको लामो बन्दाबन्दीले र चलचित्र हल खुल्ने अवस्था नभएकाले चलचित्र निर्माण, प्रदर्शन र वितरण नहुँदा ठूलो सङ्ख्यामा चलचित्रकर्मी बेरोजगार बन्न पुगेका छन् । कोरोनासँग सधैं डराएर बस्ने हो भने चलचित्रकर्मी कामविहिन र आम्दानीसमेत नहुँदा कला क्षेत्र खस्किने भएकाले जोगाउनु पर्छ भन्ने सन्देश प्रवाह गर्न जोखिम मोलेर लगानी गरेको उनले बताए ।
सरकाले लकडाउन खुकुलो बनाएसँगै लामो–छोटो दूरीको सार्वजनिक यातायात, होटल–कलकारखाना सहित प्रायः सबै व्यवसाय बौरिँदै गरेपनि सिने क्षेत्र भने ठप्प रहेको बेला चलायमान बनाउने प्रयास गर्दा खुशी लागेको कलाकारले बताएका छन् । चलचित्र क्षेत्रसँगै सरकारले पर्यटन, यातायात, हवाई तथा पर्यटकीय यातायात, वैदेशिक रोजगार सेवा प्रदायकलाई अति प्रभावित क्षेत्रका रुपमा घोषणा गरेको छ ।
व्यास इन्टरटेन्मटको प्रस्तुति रहेको चलचित्रमा निर्मातामा बिस्सुका अतिरिक्त राजेन्द्र ठकुरी, कार्यकारी निर्मातामा संसार सुवेदी छन् । चलचित्रमा ब्यास बिस्सु, अकेला विष्ट, जेरेड विलप्स, सिल्पा मास्के, गौरव पहारी, बुद्धि तामाङ, लोकेन्द्र लेखक, प्रकाश घिमिरे, सञ्चारकर्मी विष्णु गौतम, श्याम भुजेल, जयन्द्र चिलवाल लगायतले अभिनय गरेका छन् ।
चलचित्रको नेपाल र अमेरिका दुवै स्थानमा छायाङ्कन भईरहेको छ । चलचित्रको निर्देशकमा सूर्यनारायण श्रेष्ठ, एसोसियट निर्देशक दीपक ओली रहेका छन् भने छायाङ्कन बाबु श्रेष्ठ र क्रिस वारेनले गरेका छन् । कविराज गहतराजको कोरियाग्राफी रहेको चलचित्रमा सङ्गीत आशिष कार्कीले भरेका छन् भने प्रोडक्सन व्यवस्थापनमा प्रदीप आचार्य छन् ।
विदेशमा रहेका नेपालीले विपद्को समयमा जन्मभूमिलाई सम्झिएर नागरिकलाई मद्धत गर्नुपर्छ भन्ने सन्देश चलचित्रमार्फत् दिन खोजिएको छ । नायिका शिल्पाले कला क्षेत्रलाई सहज रुपमा काम गर्नुपर्ने वातावरण सरकारले मिलाउनुपर्ने बताइन् । हाल तनहुँका विभिन्न पर्यटकीय स्थलमा चलचित्रको छायाङ्कन भइरहेको छ ।
