निष्पक्ष र विश्वसनीय खबरको सँगालो 
Khabar Punja
२५ पुष २०८१, शुक्रबार
तनहुँ : नेकपा माओवादी केन्द्रको युवा सङ्गठन वाइसिएल नेपालको केन्द्रीय सदस्यमा तनहुँका दुई युवा चयन भएका छन् । मंगलबार काठमाडौमा सम्पन्न वाइसिएल नेपालको राष्ट्रिय सम्मेलनबाट शरण सापकोटा र इश्वर बस्याल केन्द्रीय सदस्यमा चयन भएका हुन् ।
सापकोटा यसअघि पनि केन्द्रीय सदस्य थिए भने बस्याल तनहुँका अध्यक्ष हुन् । शनिबारदेखि जारी सम्मेलनमा सहमतिमै नेतृत्व छान्ने धेरै प्रयास भए पनि सफल हुन नसकिएपछि पदाधिकारीबिनाको केन्द्रीय कमिटी घोषणा गरिएको छ ।
राष्ट्रिय सम्मेलनबाट २३१ जनाको केन्द्रीय समिति घोषणा गरिएको र पदाधिकारी पछि चयन गरिने भएको छ । ज्येष्ठ केन्द्रीय सदस्यको अध्यक्षतामा केन्द्रीय कमिटी बैठक बसेर त्यहीँबाट पदाधिकारी चयन गर्ने सहमति बनेको हो ।
हालका अध्यक्ष रामप्रसाद सापकोटा ‘दीपशिखा’ ले नेतृत्व छाड्ने भएपछि अध्यक्षका लागि तीनजना दाबेदार छन् । अध्यक्षका लागि सुबोध सेर्पाली, सुमन देवकोटा र यशोदा न्यौपानले दावी गरेका छन् । २०७४ साल भदौमै भएको राष्ट्रिय भेलाबाट दीपशिखा अध्यक्ष चयन हुँदा देवकोटा उपाध्यक्ष थिए भने सेर्पाली महासचिव थिए ।
त्यस्तै महासचिवमा चारजना आकांक्षी देखिएका छन् । कसम गुरुङ, गणेश शाही, मिङ्मातन्डु शेर्पा र नवराज ढुंगाना ‘विश्वास’ले महासचिवमा चाहना राखेका छन् । यसमध्ये शाही र ढुंगाना सचिव थिए भने शेर्पा कोषाध्यक्ष थिए ।
सहमतिमै नेतृत्व चयन गर्ने प्रयास सफल नभएपछि माओवादी केन्द्रको सोमबारको स्थायी कमिटी बैठकले पदाधिकारी छान्ने जिम्मा अध्यक्ष पुष्पकल दाहाल ‘प्रचण्ड’ लाई दिएको थियो । तर, प्रचण्डले अघि सारेको विकल्पमा पनि सहमति बन्न नसक्दा वाईसीएलले अहिले वैकल्पिक बाटो रोजेको हो ।
