Khabar Punja

दमौली : व्यास मार्ग अन्तरगत वैरेनी जाने बाटोमा सडकभरी पानी बगेपछि दुर्घटनाको जोखिम बढेको छ । व्यास-४ र १० को सीमाना चुरेखोल्सीमा राखिएको ह्युम पाइप टालिएर सडकमै पानी बगेपछि दुर्घटनाको जोखिम बढेको हो ।

६/७ महिनादेखि यस्तो समस्या रहेपनि सम्बन्धित निकायको ध्यान नगएको स्थानीयवासीको गुनासो छ । चुरेखोल्सीको पानी कटाउन ह्युम पाइप राखेपनि ह्युमपाइप टालिएर सडकमै पानी बग्न थालेकाले यसको समयमै समाधान गर्नुपर्ने व्यास-१० का शेरबहादुर बोटेले माग गरे ।

“यसले सडकमा दुर्घटनाको जोखिम बढाउनुका साथै सडक पनि भासिने खतरा बढेको छ,” उनले भने, “सम्बन्धित निकायले बेलैमा यसको समाधान गर्नुपर्छ ।”