Khabar Punja

तनहुँ : १५६ औं मोतीजयन्तीको अवसरमा गीतल प्रतिष्ठान नेपाल तथा नाटक मञ्च र विश्व नेपाली साहित्य प्रतिष्ठान,तनहुँको संयुक्त आयोजनामा भर्चुअल रचना वाचन कार्यक्रम सम्पन्न भएको छ।

कार्यक्रमको अध्यक्षता गीतल प्रतिष्ठान नेपाल तथा नाटक मञ्चका अध्यक्ष आकाश अधिकारीले गरेका थिए । उक्त कार्यक्रममा प्रमुख अतिथि साहित्यकार बुद राना, प्रमुख वक्ता समालोचक, साहित्यकार, युवा वर्ष मोती पुरस्कारका विजेता रमेश शुभेच्छुक रहेका थिए ।

भर्चुअल कार्यक्रममा देश तथा विदेशका विभिन्न स्थानहरुबाट दर्जन बढी साहित्यकारहरूको उपस्थिति रहेको थियो। कवि पार्वती भट्ट(डडेलधुरा), कृष्ण देवी शर्मा (नवलपुर), तिला लेकाली (मोरङ),हरी पराजुली(झापा), विमला जोशी(दार्जलिङ), लक्ष्मीप्रसाद मिश्र (लमजुङ), दृष्टिविहीन कवि चिन बहादुर कुमाल(तनहुँ),लक्ष्मी तिम्सिना(तनहूँ),जुना खड्का (तनहुँ) लगायतका स्रष्टाहरुले रचना वाचन मार्फत युवाकबि मोतीराम भट्टलाई सम्झिएका थिए।

कार्यक्रममा प्रमुख अतिथि साहित्यकार बुद रानाले युवा कवि मोतीराम भट्टलाई देशले राष्ट्रिय विभूति घोषणा गरेता पनि त्यति कदर गर्न भने नसकेकोमा निराशा व्यक्त गरे । जीवनकालको सीमित अवधिमा धेरै काम गर्ने कविको रुपमा युवाकबि मोतीराम भट्टलाई चिनिने गरेको र त्यो कलिलो युवाअवस्थामा भानुभक्तलाई चिनाउँदै नेपाली भाषा साहित्यलाई दिएको योगदान उच्च रहेको धारणा राखेका थिए ।

कार्यक्रमका प्रमुख वक्ता,साहित्यकार रमेश शुभेच्छुकले ३० वर्षको कलिलो उमेरमा आफूमात्र नभई भानुभक्तलाई समेत परिचित गराउन मोतीराम भट्टले मद्दत गरेको विचार व्यक्त गरे । स्वागत मन्तव्य विश्व नेपाली साहित्य प्रतिष्ठान तनहुँका सहसचिव जुना खड्काले गरेकी थिइन्। कार्यक्रमको संचालन विश्व नेपाली साहित्य प्रतिष्ठान, तनहूँका अध्यक्ष, गीतल प्रतिष्ठान नेपाल तथा नाटक मञ्चका सचिव दिवाकर भट्टराईले गरेका थिए ।