Khabar Punja

दमाैली । तनहुँको भानु नगरपालिका–७ बसन्तपुरस्थित थानीमाइमा कात्तिकको तेस्रो मङ्गलबार ९१ फूलको डोली भित्रिएको छ । फूलको डोली भित्र्याउन तनहुँका अतिरिक्त छिमेकी जिल्लाबाट पनि सर्वसाधारण आएको थानीमाइ मन्दिर संरक्षण समितिले जनाएको छ ।

फूलको डोली भित्र्याउन तनहुँ, कास्की, लमजुङ, गोरखा लगायतका ठाउँबाट सर्वसाधारण आएको समितिका अध्यक्ष जीवन थापा मगरले जानकारी दिए । त्यसक्रममा करिब आठ हजार एक सय भन्दा बढी भक्तनजले मन्दिरमा पूजाआजा गरेका छन् । त्यस्तै सोमबार राति जागाराम बसेर बत्ती बाल्नेको सङ्ख्या पाँच सय ११ जना रहेको थियो ।

कात्तिकको दोस्रो मङ्गलबार मन्दिरमा ७० फूलको डोली भित्रिएको छ । पहिलो मङ्गलबार भने विजयादशमी परेका कारण उक्त दिन फूलको डोली आएको थिएन ।

सोमबार सत्यनारायणको पूजा गरि फूलको डोली तयार गर्ने र थानीमाई मन्दिरमा फूलको डोली चढाउने परम्परा रहँदै आएको छ । मन्दिरमा साउन महिना, एकादशी र औंशी बाहेकका दिनमा पूजाअर्चना हुँदै आएको छ ।

प्रत्येक वर्ष कात्तिक, मङ्सिर, माघ र फागुन महिनाको मङ्गलबार थानीमाई मन्दिरमा देशका विभिन्न ठाउँबाट आएका भक्तजनले फूलको डोली चढाउने गर्दछन् । उक्त महिनाको मङ्गलबार मन्दिरमा फूलको डोली चढाउन सर्वसाधारणको भीड लाग्ने गर्दछ । मन्दिरमा फूलको डोली चढाउनाले मनको इच्छा पूरा हुने धार्मिक विश्वास रहिआएको थापाको भनाई छ ।