निष्पक्ष र विश्वसनीय खबरको सँगालो 
Khabar Punja
११ मंसिर २०८१, बुधबार
दमाैली । तनहुँको म्याग्दे गाउँपालिकाले आयोजना गरेको पाँचौ राष्ट्रपति रनिङशिल्डको उपाधि राधा माध्यमिक विद्यालयले जितेको छ । आज सम्पन्न प्रतियोगिता अन्तर्गत कूल २९ पदक जित्दै राधा माध्यमिक विद्यालयले उपाधि जितेको हो ।
राधा माविले १७ स्वर्ण, नौ रजत र तीन कास्य पदक जितेको छ । योसँगै राधा माध्यमिक विद्यालयले लगातार तीन वर्ष रनिङशिल्डको उपाधि जित्दै रनिङशिल्ड ट्रफी सधैंका लागि कब्जा गरेको छ ।
प्रतियोगितामा २३ पदक जित्दै मिन माध्यमिक विद्यालय दोस्रो भएको छ । मिन माविले पाँच स्वर्ण, १३ रजत र पाँच कास्य पदक जितेको गाउँपालिकाले जनाएकाे छ ।
त्यस्तै रत्न मावि तीन स्वर्ण पदक जित्दै तेस्रो भएको छ । महेन्द्र मावि दुई स्वर्ण, तीन रजत र सात कास्य पदक जितेर चौथो भएको छ । जनगणपति मावि दुई स्वर्ण, छ रजत र आठ कास्य पदक जित्दै पाँचौ भएको छ । गणेश मावि एक स्वर्ण र एक कास्य पदक जित्दै छैठौ भएको छ ।
त्यस्तै मेघदह बोर्डिङ स्कूल चार कास्य पदक जितेर सातौ तथा आदर्श बोर्डिङ एक कास्य पदक जितेर आठौ हुन सफल भएको छ ।
बिहीबारदेखि सञ्चालित प्रतियोगितामा छात्रछात्रा भलिबल, छात्रछात्रा कबड्डी, दौड, हाइजम्प, लङजम्प, सटपुट लगायतका खेलमा विद्यार्थीबीच प्रतिस्पर्धा गराइएको थियो ।
विजेतालाई गाउँपालिकाका अध्यक्ष श्रीप्रसाद श्रेष्ठ, उपाध्यक्ष बालकृष्ण घिमिरे लगायतले पुरस्कार वितरण गरे ।
