निष्पक्ष र विश्वसनीय खबरको सँगालो 
Khabar Punja
११ मंसिर २०८१, बुधबार
दमाैली । खेलकुदको माध्यमबाट पर्यटन प्रबद्र्धन गर्ने उद्धेश्यसहित तनहुँको ऋषिङ गाउँपालिकामा अल्ट्रा म्याराथन प्रतियोगिता हुने भएको छ । ऋषिङ गाउँपालिकाको आयोजनामा तेस्रो ऋषिङ अल्ट्रा म्याराथन हुन लागेको हो ।
पुस २७ गते ४३ किलोमिटर दूरीको म्याराथन प्रतियोगिता गर्न लागिएको गाउँपालिकाका प्रवक्ता विजय दरैले जानकारी दिए । खुल्ला म्याराथनका लागि पुस २६ गतेसम्म नाम दर्ता गर्न सकिने उनले बताए ।
म्याराथनको आवश्यक तयारी सुरु गरिएको उनले बताए । धारुङ भञ्ज्याङबाट सुरु हुने दौड रानीपोखरी, गाउँपालिकाको कार्यालय, अर्खलाछाप, काफलडाँडा, पुरानो ऋषिङ, पोखरीभञ्ज्याङ, गोठादी, ढुङ्गाडे, चालिसे, भिरकोट, अर्चल्दी, मौरीबास, दाङसिरी, दुवुङकोट पुगेर टुङ्गिनेछ ।
प्रतियोगितामा प्रथम हुनेलाई रु ६५ हजार (कर बाहेक), द्वितीय हुनेलाई रु ४० हजार (कर बाहेक), तृतीय हुनेलाई रु २५ हजार (कर बाहेक) र सान्त्वना हुने चार जनालाई रु पाँच हजार पुरस्कार प्रदान गरिनेछ ।
ऋषिङमा रहेका पर्यटकीय स्थलको प्रचारप्रसार गर्ने उद्धेश्यसहित म्याराथन गर्दै आइएको गाउँपालिकाका अध्यक्ष राजेन्द्रकृष्ण श्रेष्ठले बताए। उनले भने, “गाउँपालिकाका पर्यटकीय स्थल प्रचारप्रसारको अभावमा ओझेलमा परेका छन् । खेलकुदको माध्यमबाट ती ठाउँको प्रचारप्रसार गर्ने मुख्य उद्धेश्य हो ।”
