निष्पक्ष र विश्वसनीय खबरको सँगालो 
Khabar Punja
१ कार्तिक २०८१, शुक्रबार
दमाैली । लमजुङको क्व्होलासोथार गाउँपालिका–४ भुजुङका घरबास सञ्चालक पर्यटन प्रवर्द्धन र घरबासको अनुभव साटासाटका लागि तनहुँ आएका छन् । तनहुँको बन्दीपुर र भानु नगरपालिकामा सञ्चालित घरबाससँग अनुभव साटासाट र पर्यटन प्रवर्द्धन गर्ने उद्देश्यसहित भुजुङका पर्यटन व्यवसायी यहाँ आएका हुन् ।
लमजुङको सबैभन्दा ठूलो गुरुङ गाउँ, मौलिक कला र संस्कृतिले भरिएको भुजुङ गाउँ र तनहुँको संस्कृति, रीतिरिवाज र यहाँ सञ्चालित घरबासको अनुभव साटासाटका आएको समूहले पर्यटकीय नगरी बन्दीपुरको भ्रमण गरेको छ ।
कार्यक्रमको सहजीकरण गरेका पर्यटनविज्ञ एवम् सम्पदा नेपालका अध्यक्ष हरिसिंह गुरुङका अनुसार भुजुङबाट आएको टोलीलाई बन्दीपुरका पर्यटकीयस्थलको भ्रमण गराइएको छ । उनले भने, “यसले तनहुँको पर्यटन प्रवर्द्धनका लागि सहयोग पुग्नेछ । साथै भुजुङको पर्यटन विकासका लागि पनि यो भ्रमण कोसेढुङ्गा हुने विश्वास गरिएको छ ।”
भुजुङको कलासंस्कृति र वातावरणमैत्री विकास गतिविधि एवम् प्रक्रिया र ग्रामीण पर्यटन विकासका चुनौती, बन्दीपुर र टुटेपानीमा विकसित सकारात्मक पर्यटकीय गतिविधि एकआपसका लागि राम्रा सिकाइ हुने उनकाे भनाइ छ ।
यसैबीच भुजुङ सामुदायिक होमस्टे पर्यटन समितिको आयोजनामा बिहीबार बन्दीपुरमा होमस्टे व्यवस्थापन तालिम सञ्चालन गरिएको छ ।
गुरुङबाहुल्य भुजुङ लमजुङ सदरमुकाम बेँसीशहरदेखि ३२ किलोमिटर दूरीमा अवस्थित छ । —
