निष्पक्ष र विश्वसनीय खबरको सँगालो 
Khabar Punja
२४ कार्तिक २०८१, आईतवार
काठमाडौं । प्रहरी अतिरिक्त महानिरीक्षक (एआईजी) श्यामलाल ज्ञवालीमाथि छानबिन गर्न समिति गठन भएको छ ।
प्रहरी प्रधान कार्यालयले पनि छानबिन गठन गरिएको पुष्टि गरेको छ । प्रहरी महानिरीक्षक (आईजी) बसन्तबहादुर कुँवरको निर्देशनमा प्रशासन विभागमा कार्यरत एआईजी टेकप्रसाद राईको नेतृत्वमा छानबिन गर्न समिति गठन गरिएको हो ।
एआईजी राईको नेतृत्वमा ५ जनाको छानबिन समिति बनाइएको प्रहरी प्रधान कार्यालय स्रोतले जनाएको छ । एआईजी ज्ञवालीमाथि प्रहरीको उजुरी छानबिन निर्देशनालयमा उजुरी परेकाले छानबिनका लागि समिति गठन गरिएको हो ।
उमेर विवाद, ६० किलो सुन प्रकरणमा फरार रहेका जीवन चलाउनेको विषयलगायतमा छानबिन गर्न समिति बनाइएको प्रहरी प्रधान कार्यालय स्रोतको दाबी छ ।
संगठनमा चेन अफ कमाण्डलाई बाइपास गरेर काम गरेको आरोप पनि ज्ञवालीमाथि लगाइएको छ । पूर्वन्यायाधीश डिल्लीराज आचार्य नेतृत्वको समितिले १ चैतमा गृहमा बुझाएको प्रतिवेदनमा प्रहरीको केन्द्रीय अनुसन्धान ब्यूरो (सीआईबी)को टोलीले ६० किलोको अनुसन्धान गर्दा गम्भीर लापरबाही गरेको उल्लेख गरेको थियो ।
त्यसपछि सीआईबीका प्रमुख किरण बज्राचार्यलाई सीआईबीबाट हटाएर कार्य विभागमा कार्यरत रहेका एआईजी ज्ञवालीलाई सीआईबीको जिम्मा दिइएको थियो ।
त्यसयता उनी सीआईबीमै कार्यरत छन् । उमेर हदका कारण आगामी २६ भदौमा उनी अनिवार्य अवकाशमा जाँदैछन् । (अनलाइन खबरबाट)
