निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
दमौली। दमौली अस्पतालमा गर्भवतीको शल्यक्रियाका लागि रगत आवश्यक परेपछि युवा अभियान्ता सुदीप गफ्फारलाई फोन आउँछ । ए प्लस रगत आवश्यक परेकाले सामाजिक सञ्जालमा रक्तदाताको खोजी गर्न गफ्फारले स्ट्याटस लेख्छन् ।
एकैछिनमा व्यास नगरपालिका-२ का प्रकाश श्रेष्ठले गफ्फारलाई फोन गरेर रक्तदाता भेटिएको सूचना दिन्छन् । रक्तदाता दमौली अस्पताल आएर रगत दिन्छन् ।
यो घटना बिहीबार राति ८:३० बजेको हो । सामाजिक सञ्जालको सहायताले केही दिन यता गफ्फारले रक्तदाता खोजिरहेका छन् । अस्पतालमा आवश्यक रगत नभएपछि शल्यक्रिया गर्ने बेलामा रगत चाहियो भन्दै खबर आउने गरेको र आफूले सामाजिक सञ्जालमा पोष्ट गर्ने गरेको गफ्फार बताउँछन् ।
उनले भने, ‘अस्पतालको रक्तसञ्चार केन्द्रमा आवश्यक रगत नभएपछि अकस्मात रुपमा रगत सङ्कलन गर्नुपरेको छ । सामाजिक सञ्जालको सहायताबाट तत्कालै रगत खोज्न सहज भएको छ ।’
बिहीबार व्यास नगरपालिका-२ निवासी महेश मल्ल र स्वदेश श्रेष्ठले अस्पतालमै पुगेर ए प्लस रगत दान दिएका छन् । रगतका लागि दाता खोज्न व्यास नगरपालिका-२ कै प्रकाश श्रेष्ठले पनि सहयोग पुर्याएका छन् ।
बुधबार मात्रै पनि अस्पतालका बिरामीलाई रगत आवश्यक परेपछि व्यास नगरपालिका-२ कै प्रकाश श्रेष्ठ र निराञ्जन बतासले रक्तदान गरेका थिए ।
