निष्पक्ष र विश्वसनीय खबरको सँगालो 
Khabar Punja
२२ कार्तिक २०८१, शुक्रबार
दमौली । बिहीबारदेखि सञ्चालनमा आएको सिद्धार्थ होटलमा प्रत्येक शुक्रबार लाइभ कन्सर्ट हुने भएको छ । होटलले प्रत्येक शुक्रबार लाइभ म्युजिकको व्यवस्था गरेको हो ।
रमाइलो संगीत, स्वादिष्ट खानाका साथ अविस्मरणीय माहोलको आनन्द लिन यो व्यवस्था मिलाइएको होटलले जनाएको छ ।
सिद्धार्थ ग्रुप अफ हस्पिटालिटीको व्यवस्थापनमा तनहुँको दमौलीमा तीन तारे स्तरको ‘सिद्धार्थ होटल दमौली’ सञ्चालनमा आएको छ ।
सिद्धार्थ हस्टिपालिटीअन्तर्गत पाँच तारे स्तरमा सिद्धार्थ भिलासा, चार तारे स्तरमा सिद्धार्थ वैभव र तीन तारे स्तरमा सिद्धार्थ बाटिका ब्राण्डका होटल सञ्चालनमा छन् । जसमध्ये दमौलीको यो होटल सिद्धार्थ बाटिका अन्तर्गतको ब्राण्डमा पर्दछ ।
होटल र दुई वटा फिल्म हल रहेको यो परियोजनामा करिब रु एक अर्ब लगानी भएको छ । होटलको निर्माण एपेक्स हस्टिपालिटीले र व्यवस्थापन सिद्धार्थ ग्रुपले गरेको हो । नेपालकै ठूलो हस्पिटालिटी सञ्जाल, अन्तर्राष्ट्रिय स्तरको सेवा, विश्वसनीयता तथा कुशल व्यवस्थापनका कारण होटल व्यवस्थापन सिद्धार्थ ग्रुपसँग सहकार्यका गरिएको हो ।
होटलमा सुविधासम्पन्न कूल ३४ वटा कोठा छन् । त्यसबाहेक करिब एक सय ५० जना क्षमताको एउटा हल र करिब ४० जना अट्ने दुई हल छन् ।
