Khabar Punja

दुलेगौंडा, १५ चैत । शुक्लागण्डकी नगर उद्योग वाणिज्य संघको आयोजनामा जारी पाँचौ शुक्लागण्डकी महोत्सवमा आज साँझ प्रमोद खरेलको लाईभ कन्सर्ट हुने भएको छ ।

देश विदेशमा सर्वाधिक खोजिएका मध्य एक खरेलको कन्सर्ट साँझ ७ बजेदेखि ९ बजेसम्म हुने संयोजक सुमन सापकोटाले बताए । यसैगरी दिउँसो कलाकार घनश्याम रिजाल, सञ्जिव सिंह राना, सन्तोष केसी, तुलसा क्षेत्री लगायतको प्रस्तुती समावेश गरिएको छ ।

आर्थिक समाजिक खेलकुदको विकास, कृषि तथा पर्यटनको प्रवद्धन, शुक्लागण्डकी महोत्सव कला सिप र संस्कृतिको संरक्षण भन्ने मुल नाराका साथ जारी महोत्सव चैत १७ गते सम्म चल्ने छ ।

महोत्सवमा राष्ट्रिय तथा स्थानिय ख्यातिप्राप्त कलाकारहरुको प्रस्तुतीसँगै लाईभ कन्सर्ट, बाल उद्यान, धार्मिक, सांस्कृतिक र ऐतिहासिक स्थलको पदयात्रालाई समावेश गरिएको संघका उपमहासचिव विर्सना श्रेष्ठले जानकारी दिइन् ।

साथै पालिकास्तरीय भलिबल प्रतियोगिता, रत्यौली प्रतियोगिता, कौरा नृत्य, विद्यालयस्तरीय नृत्य प्रतियोगिता चलिरहेको छ । भलिबलतर्फ आइतवार म्याग्दे र बौद्धिकाली, माछापुच्छ«े र पुतलीबजार र शुक्लागण्डकी ए र भिमादबीच खेल हुने प्रतियोगिता संयोजक उपेन्द्र तिमिल्सीनाले जानकारी दिए । यसपटक टिकटक र रिल्स प्रतियोगिता समेत आयोजना गरिएको छ ।

महिला उद्यमी विकास समिति र सम्पूर्ण वडा व्यवस्थापन समिति को सह–आयोजनामा महोत्सव भएको हो । महोत्सवमा घरेलु, कृषि, व्यवसायिक, रेष्टुरेन्ट, सामाजिक संस्था, सुचना केन्द्र, स्वास्थ्य शिविर लगायत कुल १ सय ७५ स्टल समावेश गरिएको छ ।