निष्पक्ष र विश्वसनीय खबरको सँगालो 
Khabar Punja
२७ बैशाख २०८३, सोमबार
दमौली, २० चैत । व्यास नगरपालिकाको आयोजना तथा नेपाल पत्रकार महासङ्घ तनहुँको समन्वयमा शुक्रबार व्यास नगरपालिका–७ कलेस्तीमा चालु आर्थिक वर्षको दोस्रो चौमासिक सार्वजनिक सुनुवाइ सम्पन्न भएको छ । कार्यक्रममा स्थानीय बासिन्दाहरूले विविध समस्या तथा गुनासाहरू प्रस्तुत गरेका छन् ।
व्यास–७ का शम्शेरबहादुर कुँवरले गाउँमा बाँदरको आतङ्क बढ्दै गएको भन्दै नियन्त्रणका लागि पहल गर्न माग गरे । यस्तै, बलबहादुर रानाले राष्ट्रिय परिचयपत्र वडाबाटै वितरण गर्न र वडाबाट विनियोजन भएको बजेटको भुक्तानी प्रक्रिया पनि वडाबाटै सहज बनाउनुपर्ने धारणा राखे ।
स्थानीय सीता नेपालीले तालिम लिए पनि उद्यमी बन्न पर्याप्त सहयोग नपाएको गुनासो गर्दै नगरपालिकाले उद्यमशीलता प्रवद्र्धनमा ध्यान दिनुपर्ने बताइन् ।
व्यास–१० गणेश टोल विकास संस्थाका अध्यक्ष श्रीराम कुँवरले अव्यवस्थित बसोबासीको जग्गा नापजाँच एकैपटक व्यवस्थित ढङ्गले गर्न आग्रह गर्दै बैरेनी जग्गा एकीकरण आयोजनामा देखिएका समस्या समाधान गर्न ध्यानाकर्षण गराए ।
व्यास–६ का बामदेव पण्डितले आस्थाका आधारमा बजेट विनियोजनमा विभेद नगर्न आग्रह गरे । व्यास–९ माझफाँटका नारायण न्यौपानेले कुहिने फोहरलाई मलको रूपमा प्रयोग गर्ने र प्लाष्टिक तथा सिसाजन्य फोहर व्यवस्थापनका लागि हप्तामा कम्तीमा एक दिन सवारी साधनको व्यवस्था गर्नुपर्ने बताए ।
त्यसैगरी, व्यास–७ की सीता गुरुङले वडाले विकास निर्माणमा अपेक्षित प्राथमिकता नदिएको गुनासो राखिन् ।
कार्यक्रममा नगरप्रमुख वैकुण्ठ न्यौपानेले उठेका गुनासाहरू सम्बोधन गर्दै बाँदर नियन्त्रण राष्ट्रियस्तरकै समस्या भएको उल्लेख गरे । नगरपालिकाले यसअघि केही प्रयास गरे पनि अपेक्षित सफलता हासिल नभएको भन्दै आगामी दिनमा थप छलफल र पहल गर्ने प्रतिबद्धता जनाए । उनले सेवा प्रवाहलाई थप सहज, पारदर्शी र उत्तरदायी बनाउने प्रतिबद्धता जनाउँदै नागरिकका गुनासा सम्बोधनलाई प्राथमिकतामा राखिने बताए ।
प्रमुख प्रशासकीय अधिकृत सुकदेव लम्सालले चालु आर्थिक वर्षमा सम्पन्न भएका योजनाहरू, खर्च विवरण र उपलब्धिहरू सार्वजनिक गरेका थिए ।
कार्यक्रममा व्यास–५ का वडाध्यक्ष विष्णुकुमार श्रेष्ठ, ६ का वडाध्यक्ष जीवन गुरुङ, ७ का वडाध्यक्ष कृष्णप्रसाद न्यौपाने, ९ का वडाध्यक्ष सुरेश थापा लगायतले सहभागीका जिज्ञासा सम्बोधन गरेका थिए ।
कार्यक्रममा नगरपालिकाका उपप्रमुख इन्दिरा दरै, विभिन्न वडाका अध्यक्षहरु, विभिन्न शाखाका प्रमुखहरुको सहभागिता रहेको थियो ।
कार्यक्रमको सहजीकरण नेपाल पत्रकार महासङ्घ तनहुँ शाखाका अध्यक्ष डिपी अधिकारीले गरेका थिए ।
