निष्पक्ष र विश्वसनीय खबरको सँगालो 
Khabar Punja
१७ बैशाख २०८३, शुक्रबार
दमौली, १६ वैशाख । तनहुँको बन्दीपुर गाउँपालिका–४ सानो डुम्रेबाट हराएको सवारी साधन काठमाडौँमा फेला परेको छ।
मंगलबार राति करिब २३:५० बजेको समयमा सानो डुम्रेस्थित मुस्ताङ प्लाजा होटल अगाडि पार्किङ गरी राखिएको ग २ च ७७९३ नम्बरको गाडी हराएको थियो। उक्त गाडी गोरखा जिल्लाको पालुङटार नगरपालिका–७ मा रहेको पालुङ पोल्ट्री फिसर फर्म प्रा.लि.को नाममा दर्ता रहेको प्रहरीले जनाएको छ।
घटना सम्बन्धी जानकारी प्रहरी चौकी डुम्रेमा प्राप्त हुनासाथ प्रहरी टोली परिचालन भई खोजतलास सुरु गरिएको थियो।
अनुसन्धानका क्रममा बुधबार बिहान ०८:४० बजे काठमाडौँको कुलेश्वरस्थित सकिल अटो वर्कसपमा पार्किङ अवस्थामा उक्त गाडी फेला पारिएको प्रहरी नायब उपरिक्षक श्रवणकुमार विकले जानकारी दिए। प्रहरी वृत्त कालिमाटीबाट खटिएको टोलीले दाङ जिल्लाको तुलसीपुर उपमहानगरपालिका–६ का २८ वर्षीय बिपिन मगरलाई गाडी सहित नियन्त्रणमा लिएको छ।
नियन्त्रणमा लिइएको सवारी साधन तनहुँ ल्याउने क्रममा रहेको छ भने घटनाबारे थप अनुसन्धान भइरहेको प्रहरीले जनाएको छ ।
