निष्पक्ष र विश्वसनीय खबरको सँगालो 
Khabar Punja
११ भाद्र २०८३, शुक्रबार
दमौली, १३ भदौ । रसुवाको भोटेकोशी नदीमा आएको बाढीपछि तनहुँका विभिन्न क्षेत्रमा खोज तथा उद्धारका क्रममा हालसम्म ३१ वटा शव फेला परेका छन् । जिल्ला प्रहरी कार्यालय तनहुँका अनुसार बाढी प्रभावित क्षेत्रमा खोज तथा उद्धारका लागि परिचालित प्रहरी टोलीले आँबुखैरेनी गाउँपालिका र देवघाट गाउँपालिकाका विभिन्न स्थानबाट शव फेला पारेको हो ।
प्रहरी टोलीले शुक्रबार पनि तीन वटा शव फेला पारेको छ । देवघाट गाउँपालिका–५ स्थित त्रिशुली नदीबाट ती शव फेला परेको हो ।
भदौ १० गते ९ वटा शव र भदौ ११ गते १९ वटा शव फेला परेको प्रहरी नायब उपरिक्षक द्वारिकाप्रसाद घिमिरेले जानकारी दिए ।
तनहुँमा फेला परेका शवमध्ये ८ वटा शव प्रदेश अस्पताल दमौलीमा राखिएको छ भने २३ वटा शव पोखरा पठाइएको छ ।
फेला परेका शवको पहिचानका लागि आवश्यक प्रक्रिया अघि बढाइसकिएको प्रनाउ घिमिरेले बताए । बाढीका कारण हराइरहेका व्यक्तिको खोजी तथा उद्धार कार्य शनिबार पनि सञ्चालन गरिने उनले बताए ।
