निष्पक्ष र विश्वसनीय खबरको सँगालो 
Khabar Punja
१० आश्विन २०८३, आईतवार
तनहुँ, ११ असोज । अविरल वर्षाका कारण तनहुँका विभिन्न स्थानमा घरहरू जोखिममा परेपछि प्रहरीले स्थानीय बासिन्दालाई सुरक्षित स्थानमा सारेको छ ।
आज बिहान राति म्याग्दे गाउँपालिका–२ जामुनेमा अविरल वर्षाका कारण बगरसहितको लेदो बस्तीमा खसेर स्थानीय खिमा देवी विकको दुईतले पक्की घरमा क्षति पुगेको छ । बिहान करिब २ बजे घरमाथिको बारीबाट आएको लेदोले घरको भुइँतलाको बीच कोठाको ढोका, झ्याल तथा पर्खालमा क्षति पु¥याएको प्रहरी नायब उपरिक्षक द्वारिकाप्रसाद घिमिरेले जानकारी दिए ।
घटनाको जानकारी पाएलगत्तै प्रहरी टोली घटनास्थलमा पुगेको थियो । जोखिमलाई मध्यनजर गर्दै खिमा देवीसहित परिवारलाई छिमेकीको घरमा सुरक्षित स्थानान्तरण गरिएको उनले बताए ।
त्यस्तै, घिरिङ गाउँपालिका–१ पुट्टारस्थित गुहिया खोलामा आएको बाढीले खोलाको धार परिवर्तन गर्दा स्थानीयको घरमा पानी पसेको छ । बिहान करिब ३ः३० बजे आएको बाढीले भुमलाल दरैको घरसहित अन्य ३÷४ वटा ढुङ्गा–माटोले बनेका कच्ची घरको तल्लो तलामा पानी पसेको हो ।
घरहरू जोखिममा परेको सूचना प्राप्त भएपछि प्रहरी चौकी पुट्टारबाट प्रहरी टोली घटनास्थलमा पुगेको थियो । प्रहरीले जोखिममा रहेका घरका परिवारका सदस्यलाई सुरक्षित स्थानमा सारेको जनाएको छ । घटनामा मानवीय तथा पशुचौपायाको क्षति नभएको प्रहरीले जनाएको छ ।
अविरल वर्षाका कारण जिल्लाका विभिन्न स्थानमा बाढी, पहिरो तथा डुबानको जोखिम बढेकाले स्थानीय प्रशासन तथा प्रहरीले सतर्क रहन आग्रह गरेको छ ।
