निष्पक्ष र विश्वसनीय खबरको सँगालो 
Khabar Punja
७ आश्विन २०८१, मंगलवार
तनहुँ : तनहुँको व्यास नगरपालिकाले गत जेठ २ र ३ गते स्वाब सङ्कलन गरी परीक्षणका लागि पोखरा पठायो । कोरोना सङ्क्रमण बढेपछि नगरपालिकाले पिसिआरको दायरा बढाउँदै स्वाब सङ्कलन गरी परीक्षणका लागि पठायो ।
स्वाब पठाएको एक हप्ता बित्दा समेत प्रदेशले रिपोर्ट पठाएको छैन । रिपोर्ट आउनै ढिला भएपछि कोरोना जोखिम झन् बढेको नगरपालिकाले जनाएको छ । व्यास नगरपालिका–१० का एक व्यक्तिले स्वाब दिएको एक हप्तासम्म पनि रिपोर्ट नआउँदा मानसिक तनाव भएको बताउनुभयो ।
नगरपालिकाका प्रमुख वैकुण्ठ न्यौपानेले रिपोर्ट ढिलाई भएकोबारे प्रदेश जनस्वास्थ्य प्रयोगशालासँग जानकारी माग गरिएको बताउनुभयो ।
नगरपालिकामा हालसम्म ६ सय ५९ जनाको पिसिआर स्वाब परीक्षण गरिएकामा तीन सय ५७ जना सङ्क्रमित भई एक सय २२ जना सङ्क्रमणमुक्त भइसकेका छन् । त्यसमध्ये दुई सय २४ जना उपचारको क्रममा छन् भने ११ जनाको मृत्यु भएको छ ।
प्रदेश जनस्वास्थ्य प्रयोगशालाले भने प्रदेशभरबाट स्वाब थुप्रिएकाले रिपोर्टमा ढिलाई भएको बताएको छ ।
तीन सय ५८ को रिपोर्ट आउन बाँकी
स्वास्थ्य कार्यालयका अनुसार जिल्लाबाट पठाइएका तीन सय ५८ जनाको रिपोर्ट आउन बाँकी छ । व्यास नगरपालिकाको एक सय ७९, भिमाद नगरपालिकाको ७६, ऋषिङ गाउँपालिकाको १६, देवघाट गाउँपालिकाको २७, बन्दीपुर गाउँपालिकाको ३१ र आँबुखैरेनी गाउँपालिकाको २९ जनाको रिपोर्ट आएको छैन ।
वैशाख १ गतेदेखि यता तनहुँमा एक हजार एक सय ७३ जनालाई कोरोना सङ्क्रमण भएकामा दुई सय २६ जना निको भई हाल ९ सय १६ सक्रिय सङ्क्रमित रहेको स्वास्थ्य कार्यालयका प्रमुख शङ्करबाबु अधिकारीले जानकारी दिनुभयो । जिल्लामा वैशाख १ गतेदेखि ३१ जनाको मृत्यु भएको छ ।
