Khabar Punja

भानु : सोमबार राति परेको भीषण वर्षापछि गएको पहिराले अवरुद्ध भएको डुम्रे–वेसीशहर सडकखण्ड एकतर्फी सुचारु भएको छ । तनहुँको भानु नगरपालिका–८ स्थित पाँचसय फाँटमा पहिरा जाँदा अवरुद्ध भएको सडकखण्ड मङ्गलबार बिहान १० बजेदेखि एकतर्फी सञ्चालनमा आएको हो ।

सडकभन्दा माथिको ढिस्को खसेर लेदो सहितको पहिराले सडकखण्ड अवरुद्ध हुँदा सयौ सवारी साधन रोकिएका थिए । उक्त सडकखण्ड एकतर्फी सञ्चालनमा आएपछि रोकिएका सवारीसाधनलाई गन्तव्यतर्फ पठाइएको जिल्ला प्रहरी कार्यालय तनहुँका प्रहरी नायब उपरिक्षक युवराज तिमिल्सिनाले जानकारी दिए ।

सडक डिभिजन कार्यालयको सहयोगमा जेसीभी प्रयोग गरी पहिरा पन्छाएर दुईतर्फी सञ्चालनमा ल्याउन काम भइरहेको छ । “दुईतर्फी रुपमा बाटो सुचारु गराउन केही समय लाग्ने देखिएको छ,” तिमिल्सिनाले भने ।