Khabar Punja

दुलेगाैडा : सरकारले शिक्षकलाई निजामती कर्मचारी सरह समान व्यवहार नगरेको भन्दै विराेध गरेका छन् । बिहीबार देशभरका शिक्षकले टाउको र हातमा कालोपट्टी बाँधेर सांकेतिक बिरोध गरेका हुन् ।

सरकारले निजामती कर्मचारीलाई तोकेको भन्दा धेरै सुविधा दिएको तर शिक्षकलाई असमान व्यवहार गरेकाले सांकेतिक विराेध गरेको स्थायी शिक्षक हकहित मञ्चका केन्द्रीय संयोजक रमेशबाबु भट्टराईले बताए ।

‘निजामती कर्मचारीले पर्यटन काज पाउने । अझ पर्यटन काजमा श्रीमतीलाई पनि लान पाए । श्रीमतीलाई थप्नुभन्दा शिक्षकलाई सुविधा दिएको भए हुन्थ्यो नि त’, भट्टराईले अगाडी थप्दै भने, ‘निजामति कर्मचारीका छोराछोरीलाई १० लाख रुपैयाँसम्मको छात्रवृत्ति हुन्छ । शिक्षकको छोराछोरीलाई छैन् । कहीँ समानता भएन । यी लगायतका विभेदको बिरुद्धमा आन्दोलनको सुरुवात गरेका हौँ ।’

आफूहरुको माग पुरा नभए दोस्रो चरणको आन्दोलनको घोषणा गर्ने उनले चेतावनी दिए । सडक, अदालत, सदन चारैतिरबाट दबाब दिएर सरकारलाई घेराबन्दीमा पार्ने अभियानमा रहेको उनले बताए । सामुदायिक विद्यालयमा कार्यरत शिक्षकलाई सरकारले असमान व्यवहार गरेको भन्दै स्थायी शिक्षक हकहित मञ्चका केन्द्रिय संयोजक रमेशबाबु भट्टराई लगायत ५० जनाले १६ असारमा सर्वाेच्च अदालतमा रिट दायर गरेका थिए ।

रिटमा शिक्षकलाई १० दिनको सुविधासहितको भ्रमण काज, सन्ततिलाई छात्रवृत्ति, १० लाख रुपैयाँकोको दुर्घटना बिमा, एक लाख रुपैयाँको स्वास्थ्य सुरक्षा बिमा, विद्यालयका शिक्षक–कर्मचारीका लागि छुट्टै अस्पताल लगायत माग गरिएको छ । सर्वोच्चले १७ असोजमा पेशी तोकेको छ । यसअगाडी पनि दुई पटक पेशी तोकिएकोमा सरकारी पक्ष उपस्थित नभएको भट्टराईले जानकारी दिए ।