निष्पक्ष र विश्वसनीय खबरको सँगालो 
Khabar Punja
९ पुष २०८१, बुधबार
दमौली । पृथ्वीराजमार्ग अन्तर्गत तनहुँको आँबुखैरेनी गाउँपालिका–१ आँधीखोलामा मंगलबार बिहान इट्टा बोकेको ट्रक पुलबाट खसेर दुर्घटना भएको छ । डुम्रेबाट आँबुखैरेनी जाँदै गरेको बा प्र ०१–००१ य १६५९ नम्बरको स्कोरपियोलाई विपरित दिशाबाट आउँदै गरेको ए २–०३००–१ केएच २४४८ नम्बरको ट्रकले ठक्कर दिएको थियो ।
ठक्करपश्चात् स्कोरपियो सडकमै रहेको र ट्रक पुलको बीच भागबाट खसेर दुर्घटनाग्रस्त भएको जिल्ला प्रहरी कार्यालय तनहुँले जनाएको छ। स्कोरपियोमा सवार चार जना शकुसल रहेपनि ट्रकमा के कति सवार थिए भन्ने नखुलेको प्रहरीको भनाई छ।
दुर्घटनाग्रस्त ट्रकलाई तान्नका लागि क्रेन ल्याइ उद्धार कार्य भइरहेको प्रहरीले जनाएको छ । दुर्घटनास्थलमा इलाका प्रहरी कार्यालय आँबुखैरेनीबाट प्रहरी निरीक्षक टेकप्रसाद सुवेदीको नेतृत्वमा नौ जनाको टोली र प्रहरी चौकी डुम्रेबाट पॉच जनाको प्रहरी खटिएको छ ।
