निष्पक्ष र विश्वसनीय खबरको सँगालो 
Khabar Punja
११ मंसिर २०८१, बुधबार
तनहुँ । तनहुँको व्यास नगरपालिका–४ निवासी दुवै मिर्गौला पीडित रामलाल श्रेष्ठको उपचारमा सहयोग पु¥याउन अमेरिकाबाट सहयोग प्राप्त भएको छ । व्यास नगरपालिका-४ घर भई हाल अमेरिकाको न्युयोर्क बस्नुहुने डा. अविन ओझा र सिटल बस्नुहुने अरुण ओझाले श्रेष्ठको उपचारका लागि रु १२ हजार सहयोग गर्नुभएको हो ।
कामको शिलशिलामा गत साउन २१ गते करेन्ट लागेर छोरा गुमाउनुभएका मिर्गौला पीडित श्रेष्ठलाई उपचारमा सहयोग पुगोस् र अन्यलाई पनि सहयोग गर्ने प्रेरणा जगाउन आफूहरुले सहयोग गरेको डा. अविन ओझाले बताउनुभयो ।
उहाँका भाई अरुण ओझाले मिर्गौला पीडित श्रेष्ठको परिवारका बारेमा सामाजिक सञ्जालबाट थाहा पाएपछि केही सहयोग गर्ने इच्छा भएकाले थोरै रकम भएपनि सहयोग गर्न पाउँदा खुशी लागेको बताउनुभयो । आफ्नै ठाउँको व्यक्तिलाई परेको पीडामा केही मलम लगाउन सकियोस् भन्नका लागि आफूहरुले उक्त सहयोग गरेको ओझाले बताउनुभयो ।
उक्त रकम खबरपुञ्ज डटकमका कार्यकारी सम्पादक एवं राष्ट्रिय समाचार समिति (रासस)का दमौली प्रतिनिधि कृष्ण न्यौपानेले सोमबार पीडित श्रेष्ठलाई हस्तान्तरण गर्नुभएको छ ।
सोही अवसरमा पत्रकार न्यौपानेले आफ्नो जन्मदिनको अवसरमा रु पाँच हजार रकम मिर्गौला पीडित श्रेष्ठलाई हस्तान्तरण गर्नुभएको छ । रकम सानो भएपनि सबैले थोरै थोरै सहयोग गरे श्रेष्ठको उपचारका लागि ठूलो सहयोग पुग्ने पत्रकार न्यौपानेले बताउनुभयो ।
रकम हस्तान्तरणका अवसरमा मिर्गौला पीडित श्रेष्ठको उपचारका लागि सहयोग गर्न गठन गरिएको म्याग्दे दमौली सम्पर्क समाजका सदस्य एवं पत्रकार विवि श्रेष्ठ समेत उपस्थित हुनुहुन्थ्यो ।
