निष्पक्ष र विश्वसनीय खबरको सँगालो 
Khabar Punja
१५ आश्विन २०८१, बुधबार
तनहुँ : तनहुँको व्यास नगरपालिका–५ मानहुँकोटमा बुधबार बिहान भएको दुर्घटनामा सवारी चालकको लापरवाही पाइएको छ । मानहुँकोट पुग्ने बेलामा गरिएको ढलानबाट माइक्रो पछाडी हटेर सडकबाट ६÷७ सय मिटर तल खस्दा एक जनाको मृत्यु भएको छ ।
पोखराबाट मानहुँकोट जाँदै गरेको ग १ ख २९४२ नम्बरको माइक्रो दुर्घटना भएको हो । ढलान सकिने बित्तिकै ढिस्कोमा माइक्रोको बम्फर छोएपछि चालक गाडीबाट झरेका थिए । चालक झरेपछि केही यात्रु पनि झरेका थिए । तर उनीहरु झर्ने बित्तिकै गाडी अचानक भीरबाट खस्यो । गाडीभित्रै रहेका तल्लो गगनगौडाकी २८ वर्षीया सुनिता गुरुङ, अर्की महिला र दुई बच्चा पनि सँगसँगै गाडीबाट खसे ।
जिल्ला ट्राफिक प्रहरी कार्यालय तनहुँका प्रमुख रेशम रानाभाटका अनुसार दु्र्घटनामा सुनिताको मृत्यु भएको छ । उनको दमौलीस्थित रत्नहरि अस्पतालमा मृत्यु भएको हो । “दुर्घटनामा सवारी चालकको गल्ती देखिन्छ, उकालो बाटोमा चालक गाडीबाट झर्न हुन्थेन, गाडीमा पनि ओट लगाउनुपथ्र्यो,” रानाभाटले भन्नुभयो । माइक्रो चालक प्रहरी नियन्त्रणमा छन् ।
माइक्रोमा १४ जना सवार थिए । उनीहरु सबै तल्लो गगनगौडाका हुन् । घर वरपरकै मानिसहरु मिलेर मानहुँकोट घुम्न आउँदै थिए । पछिल्लो समय निकै चर्चित बनेको मानहुँकोटमा दैनिक आन्तरिक पर्यटकको भीड बढेको छ । बिहानै ३ बजेदेखि आन्तरिक पर्यटक मानहुँकोट पुग्ने गरेका छन् ।
