निष्पक्ष र विश्वसनीय खबरको सँगालो 
Khabar Punja
२९ कार्तिक २०८१, शुक्रबार
तनहुँ : श्रीमती जिस्काउनेलाई गाली गर्दा श्रीमानले उल्टै पिटाइ खाएको भिडियो सार्वजनिक भएको छ । काठमाडौं–२६ मित्रनगरस्थित नयाँ बसपार्कको २ नम्बर गेट अगाडि सडकमा एक जना युवालाई तीन÷चार जना मानिसको समूह मिलेर सोमबार कुटपिट भएको थियो। उक्त भिडियो सामाजिक सञ्जालमा भाइरल भएपछि प्रहरीले अनुसन्धान गरेको थियो ।
अनुसन्धानका क्रममा सुनसरी घर भएका अमर लिम्बू श्रीमतीसँग बाटो हिँडिरहेका बेला केही युवाहरुले उहाँकी श्रीमतीलाई जिस्काएका थिए । श्रीमती जिस्काउनेलाई लिम्बूले गाली गरेपछि उल्टै पिटिनुभएको थियो । उक्त घटनामा संलग्न भएको आरोपमा प्रहरीले तीन जनालाई पक्राउ गरेको छ ।
पक्राउ पर्नेहरुमा गोरखाको गण्डकी गाउँपालिका–१ घर भई काठमाडौं ढुंगेधारा बस्ने ३० वर्षीय सोमबहादर गुरुङ, तनहुँको बन्दीपुर–६ घर भई ढुंगेधारा नै बस्ने २३ वर्षीय भरत गुरुङ र तनहुँको शुक्लागण्डकी गाउँपालिका–४ घर भई टोखा नगरपालिका–५ धापासी बस्ने ४५ वर्षीय दीपेन्द्र थापा रहेको महानगरीय प्रहरी वृत्त महाराजगञ्जका डिएसपी रोशन खड्काले बताउनुभयाे ।
उनीहरुलाई वृत्त महाराजगञ्ज र महानगरीय प्रहरी प्रभाग गोंगबुबाट खटिएको टोलीले पक्राउ गरेको हो । पक्राउ परेका तीनै जनाविरुद्द अभद्र व्यवहारको कसुरमा म्याद थप गरेर प्रहरीले अनुसन्धान सुरु गरेको छ । (नेपाल लाइभबाट)
