निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
पाेखरा : लामो समयको किचलोका बीच गण्डकी प्रदेश सरकारले पूर्णता पाएको छ । मुख्यमन्त्रीमा कृष्णचन्द्र नेपाली पोख्रेलले शपथ लिएसँगै भागबण्डामा रुमलिएको प्रदेश सरकारले लामो समयपछि पूर्णता पाएको हो ।
नेपाली काङ्ग्रेसबाट तीन र नेकपा माओवादी केन्द्रबाट तीन गरी ६ जनाले शुक्रबार शपथग्रहण गरेका छन् । शपथग्रहणसँगै गण्डकीको मन्त्रिपरिषद् ११ सदस्यीय भएको छ । नेपाली काङ्ग्रेसबाट मुख्यमन्त्री सहित पाँच, नेकपा माओवादी केन्द्रबाट चार, जनता समाजवादी र स्वतन्त्र एक÷एक मन्त्री छन् ।
नेपाली काङ्ग्रेसका वरिष्ठ नेता रामचन्द्र पौडेलले डोवाटेलाई मन्त्री बनाउन सिफारिस गरेपनि मुख्यमन्त्री पोख्रेलले उनको नाम काटेर विन्दु थापालाई मन्त्री बनाएका हुन् । विन्दु थापालाई मन्त्री बनाउन प्रधानमन्त्री एवं नेपाली काङ्ग्रेसका सभापति शेरबहादुर देउवाले निर्देशन दिएको स्रोतले बतायो ।
पूर्णता पाएको मन्त्रिपरिषद्मा एक जना मात्रै महिला समेटिएका छन् । त्यस्तै दलितको सङ्ख्या शुन्य छ । महिलामा नेकपा माओवादी केन्द्रबाट मधु अधिकारीले स्वास्थ्य तथा जनसङ्ख्या मन्त्रालयको जिम्मेवारी पाएकी छन् ।
नेपालको संविधानले हरेक क्षेत्रमा महिलाको ३३ प्रतिशत सहभागिता सुनिश्चित गरिसकेको छ । तर, ११ सदस्यीय मन्त्रिमण्डल रहेको गण्डकी प्रदेश सरकारमा अहिले ९.०९ प्रतिशत मात्रै महिलाको सुनिश्चितता भएकाे छ ।
दलित र महिलालाई अवसर दिने भनेर भाषणमा नथाक्ने नेपाली काङ्ग्रेसले मन्त्रिपरिषद्मा विस्तारमा दलित र महिला दुवैलाई अवसर दिएन । दलित समुदायका समानुपातिक सांसद तनहुँका डोवाटे विश्वकर्मा मन्त्री बन्ने निश्चित भएको अवस्थामा अन्तिममा उनको नाम कटेर धनाढ्य सांसद विन्दु थापाले काङ्ग्रेसले अवसर दिएको छ । मन्त्रीबाट उनको नाम काटिँदा तनहुँका काङ्ग्रेस कार्यकर्ताले विरोध जनाएका छन् ।
नेपाली काङ्ग्रेसले मन्त्री नियुक्त गर्दा समावेशी नबनाएको भन्दै सत्तारुढ दलकै सांसदले विरोध जनाएकी छन् । प्रदेशसभा सदस्य आशा कोइरालालले प्रदेश सरकारमा काङ्ग्रेसको तर्फबाट एक सय प्रतिशत पुरुष मन्त्री नियुक्त गर्नु समावेशी सिद्धान्तको उपहास भएको बताइन् ।
