निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
दुलेगौँडा : नेपाली काँग्रेस म्याग्दे गाउँ समितिको सचिव पदमा युवा नेता गौरवराज रानाले उम्मेदवारी घोषणा गरेका छन् । काँग्रेसको १४ औँ महाधिवेशन अन्तर्गत तनहुँमा शनिबार गाउँ तथा नगर अधिवेशन हुँदैछ ।
युवा नेता रानाले पार्टीको अग्रज र नयाँ पुस्तालाई जोड्ने सेतु बन्न आफूले उम्मेदवारी दिएको बताउँछन् । उनी भन्छन्, ‘अग्रजले पार्टीमा गरेको योगदानलाई सम्मान गर्नुपर्छ । नेपाली कांग्रेस बुढाको पार्टी भन्न थालिएको छ । युवाहरुको आकर्षण छैन । अग्रजको सम्मान र युवा पुस्ताको आकर्षण बढाउन उम्मेदवारी दिएको हुँ ।’ उनले आफू निर्वाचित भएको खण्डमा सबै पक्षलाई समान तरिकाले समेटेर पार्टीलाई मजबुत बनाउन लागिपर्ने बताए ।
गौरव स्वर्गीय नेता ताराराज राना र म्याग्दे गाउँपालिका अध्यक्ष मायादेवी रानाका छोरा हुन् । उनी बाल्यकालदेखि नै राजनीतिक वातावरणमा हुर्किए, पार्टीप्रति आस्थावान थिए । २०६४ सालदेख भने उनी नेपाल विद्यार्थी संघमा प्रवेश गर्दै कृयाशिल राजनीतिमा लागेका हुन् । नेपाली विद्यार्थी संघको दुई कार्यकाल जिल्ला सदस्य भएका उनी तरुण दलमा पनि सक्रिय छन् ।
म्याग्देको सचिवमा रानासँगै सुन्दरमणी अधिकारी, श्रीभद्र आचार्य, राम घिमिरेले समेत आकाङ्क्षा देखाएका छन् ।
