Khabar Punja

दमाैली । कोभिड–१९ बाट मृत्यु भएकाको परिवारले आर्थिक सहयोग प्राप्त गर्ने भएका छन् । स्वास्थ्य कार्यालय तनहुँले कोभिड–१९ बाट मृत्यु भएकाको परिवारलाई आर्थिक सहायता प्रदान गर्न लागेको हो ।

कोभिड–१९ का कारण मृत्यु भएका व्यक्तिका परिवारलाई आर्थिक सहायता उपलब्ध गराउने सम्बन्धी अवधारणापत्र २०७८ बमोजिम आर्थिक सहयोग गर्न लागिएको कार्यालयका सूचना अधिकारी एवं खोप अधिकृत शङ्करबाबु अधिकारीले जानकारी दिए। गण्डकी प्रदेश सरकारको स्वास्थ्य शाखा जनसङ्ख्या मन्त्रालय अन्तर्गत स्वास्थ्य निर्देशनालयको कार्यक्रममार्फत् कोभिडबाट मृत्यु भएका परिवारलाई प्रति परिवार रु ५० हजारका दरले आर्थिक सहायता उपलब्ध गराइनेछ ।

जिल्लाका दश वटै पालिकामार्फत् कोभिडबाट मृत्यु हुनेको विवरण माग गरिएको अधिकारीले बताए । “अस्पतालमा मृत्यु भएका व्यक्तिका परिवारले मात्र आर्थिक सहायता पाउनेछन्, होम आइसोलेशनमा मृत्यु भएकाले रकम पाउँदैनन्,” उनले भने “सबै पालिकाबाट विवरण प्राप्त भएपछि रकम निकासा गर्छौ ।”

आर्थिक सहायता प्राप्त गर्नका लागि मृतकका परिवारले कोभिड–१९ पोजेटिभ भएको रिपोर्ट, अस्पतालमा मृत्यु भएको प्रमाणपत्र, मृत्युदर्ता प्रमाणपत्रको प्रतिलिपि, आर्थिक सहायता दाबी गर्ने मृतकको नजिकको नातेदारको नेपाली नागरिकताको प्रमाणित प्रतिलिपि, आर्थिक सहायता दाबी गर्ने नजिकको नातेदारको मृतकसँगको नाता प्रमाणित अनिवार्य पेश गर्नुपर्ने प्रावधान छ ।

तनहुँमा कोभिड–१९ बाट एक सय ५६ जनाको मृत्यु भएको तथ्याङ्क छ । त्यसमध्ये महिला ६१ र पुरुष ९५ छन् । दोस्रो लहरको कोरोना सुरु भएपछि वैशाख यता मात्रै एक सय २९ जनाको मृत्यु भएको थियो । भानुका नौ, व्यासका ४५, शुक्लागण्डकीका ५४, भिमादका २४, म्याग्देका दश, घिरिङका छ, ऋषिङका एक, देवघाटका एक, बन्दिपुरका तीन र आँबुखैरेनीका तीन जनाको कोरोना सङ्क्रमणबाट मृत्यु भएको स्वास्थ्य कार्यालयले जनाएको छ ।

सर्वाधिकार सुरक्षित नोट : यस खबरपुञ्ज डटकममा सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं ।