निष्पक्ष र विश्वसनीय खबरको सँगालो 
Khabar Punja
७ मंसिर २०८१, शनिबार
भानु । नेपाली काङ्ग्रेसका केन्द्रीय सदस्य शङ्कर भण्डारीले गृहवडामा काङ्ग्रेसलाई जिताउन नसक्दा आफूमाथि प्रश्न उठ्ने गरेको बताएका छन् ।
तनहुँको भानु नगरपालिका–८ मा आइतबार आयोजित कार्यक्रममा बोल्दै भण्डारीले भने, “मेरो आफ्नै वडा पुर्कोटमा काङ्ग्रेसलाई जिताउन नसक्दा देशभरबाट प्रश्न उठ्ने गरेको छ । काङ्ग्रेसले जितेमात्र राष्ट्रियस्तरमा मेरो इज्जत बढ्छ ।” उनले आफ्नो इज्जतका लागि अब हुने स्थानीय तह निर्वाचनमा पुर्काेटमा काङ्ग्रेसलाई जिताइदिन आग्रह गरे ।
एमसिसी देशको हितमा छ
उनले एमसिसी देशको हितमा रहेको बताए । भण्डारीले एमसिसी नेपालको विकासका लागि आवश्यक परियोजना रहेको उल्लेख गरे । एमसिसीका विषयमा कम्युनिष्ट पार्टीले जनतामा भ्रम फैलाएकाले जनता अलमलमा परेको भएपनि जनता विस्तारै सचेत हुन थालिसकेको उनले बताए । “एमसिसीको विरोध गरेर जनतालाई सडकमा पठाउने काम भयो, एमसिसीमा काङ्ग्रेसलाई दोषी देखाउन खोजियो, अहिले एमसिसी ठिक छ भन्ने पक्षमा उहाँहरु पनि आउनुभयो,” भण्डारीले भने।
भण्डारीले कम्युनिष्टहरुले जनतामा सपना मात्रै बाँडेको आरोप लगाउँदै उक्त सपना पूरागर्नेतर्फ काम नगरेको बताए । नेकपा एमाले र नेकपा माओवादीबीच एकता भई तीन वर्ष कम्युनिष्टको सरकार बनेपनि सरकारले जनभावना अनुसार काम नगरेको भण्डारीको भनाई थियो ।
