Khabar Punja

एजेन्सी । इङ्ग्लिस क्लब म्यानचेस्टर सिटी र स्पेनिस क्लब बार्सिलोना बराबरीमा रोकिएका छन्। बार्सिलोनाको घरेलु मैदान क्याम्पनाउमा सम्पन्न मैत्रीपूर्ण खेलमा सिटी र बार्सिलोना ३-३ गोलको बराबरीमा रोकिएका हुन्।

खेलको २१ औं मिनेटमा जुलियन अल्भारेजको गोलमा सिटीले अग्रता बनाएको थियो। तर २९ औं मिनेटमा बार्सिलोनाका पियरे एम्रिक औबुमेयाङले सर्जियो बुस्केटको पासमा गोल गर्दा पहिलो हाफमा १-१ गोलको बराबरीमा रोकियो।

दोस्रो हाफमा भने बार्सिलोनाले अग्रता बनायो। बार्सिलोनाका लागि ६७ औं मिनेटमा फ्रेन्की डी जोङले गोल गर्दै अग्रता बनाए पनि त्यसको तीन मिनेट नबित्दै सिटीका कोल पाल्मेरले जोआओ क्यान्सेलोको पासमा गोल गर्दै खेल बराबरीमा ल्याए। ७९ औं मिनेटमा मेम्फिस डिपेले फेरि बार्सिलोनालाई अग्रता दिलाए। यसपटक इन्ज्युरी समयमा पाएको पेनाल्टीको अवसरलाई सदुपयोग गर्दै सिटीका रियाद महरेजले खेल बराबरीमा ल्याए।

यो च्यारिटी खेल यसअघि समरको महिनामै खेलाउने तालिका भएको भए पनि कोभिड १९ को संक्रमण युरोपमा फैलिएपछि स्थगित गरिएको थियो।