निष्पक्ष र विश्वसनीय खबरको सँगालो 
Khabar Punja
१६ मंसिर २०८१, सोमबार
एजेन्सी । क्याटलान क्लब बार्सिलोना लामो समयको प्रतीक्षा र मिहिनेतपछि अन्तत: स्पेनिस ला लिगाको शीर्षस्थानमा पुगेको छ । साविक विजेता रियल म्याड्रिडसँग बराबर अंकमा भएपनि बार्सिलोना गोल अन्तरको आधारमा शीर्षस्थानमा रहेको हो ।
दुवै रियल म्याड्रिड र बार्सिलोनाको १९ अंक रहेको छ । यसपटक ट्रान्सफर बजारमा खुलेर खर्च गरेको बार्सिलोनाले आक्रमणलाई बलियो बनाएको थियो । त्यसैको फलस्वरूप टोलीले +१८ को गोलअन्तर बनाएको छ । रियल म्याड्रिडले भने +११ गोल अन्तरसहित दोस्रो स्थानमा छ ।
बार्सिलोना ८ सय ३६ दिन अर्थात २ वर्ष, ३ महिना र १३ दिनपछि लिगको अंक तालिकाको शीर्षस्थानमा उक्लिएको हो । पछिल्लो पटक बार्सिलोना शीर्षस्थानमा रहँदा टोलीको प्रशिक्षक किके सेटिएन रहेका थिए । सन् २०१९/२० सिजनको २९ औं खेलपछि टोली शीर्षस्थानमा थियो ।
प्रशिक्षक रोनाल्ड कोम्यान नेतृत्वमा रहँदा बार्सिलोना अंक तालिकाको शीर्ष स्थानमा उक्लन सकेन । डच प्रशिक्षकको प्रस्थानपछि भने क्लब पूर्व खेलाडी जाभी हर्नान्डेजलाई अनुबन्ध गर्यो । त्यसयता भने टोलीले निरन्तर राम्रो प्रदर्शन गरिरहेको छ ।
रियल र बार्सिलोना अबको दुई सातामा एल क्लासिकोमा आमने सामने हुँदैछन् । यस्तोमा अर्को साता रियल गेटाफेको घरमा जाँदैछ । सेल्टा भिगोले क्याम्प नोउमा बार्सिलोनासँग खेल्नेछ ।
