निष्पक्ष र विश्वसनीय खबरको सँगालो 
Khabar Punja
१० मंसिर २०८१, मंगलवार
दुलेगाैडा । शुक्लागण्डकी नगरपालिका–५ बेलचौतारास्थित भानुभक्त क्याम्पसमा चार विद्यार्थी सङ्गठनले तालाबन्दी गरेका छन् । स्ववियु निर्वाचन सार्ने षड्यन्त्र भएको विरोधमा उनीहरुले क्याम्पस प्रशासन र निर्वाचन अधिकृतको कार्यालयमा तालाबन्दी गरेका हुन् ।
नेपाल विद्यार्थी सङ्घ भानुभक्त क्याम्पस इकाई, अखिल (क्रान्तिकारी), अनेरास्ववियु र अनेरास्वववियु (क्रान्तिकारी) कमिटीले सोमबार तालाबन्दी गरेका हुन् ।
क्याम्पस प्रशासन स्ववियु निर्वाचन नगराउने षड्यन्त्रमा लागेपछि विरोध स्वरुप तालाबन्दी गरिएको अखिल (क्रान्तिकारी) क्याम्पस इकाई कमिटी अध्यक्ष विनिता भण्डारीले बताइन् । त्रिविको कार्यतालिका अनुसार निर्वाचन कार्यतालिका सार्वजनिक नगरी कल्याणकारी परिषद्को छलफलको नाउँमा अलमलाउने काम भएको भण्डारीले बताइन् । “नियमित रुपले अध्ययन गरिरहेका विद्यार्थीहरुलाई भर्ना समेत हुन नदिई एउटा संगठन विशेषका दबाबका कारण निर्वाचन घोषणा गरियो । विद्यार्थीलाई एजेण्डा राख्ने तथा शान्तिपूर्ण तरिकाले मत माग्ने अधिकारबाट समेत वञ्चित गराई निर्वाचन तयारी भन्दै चैत ५ गतेसम्म पठनपाठन बन्द गरी विद्यार्थीलाई क्याम्पसमा आगमनमा रोक लगाइएको छ,” उनले भनिन् ।
चारवटै संगठनले संयुक्त विज्ञप्ती जारी गरी भयरहित र शान्तिपूर्ण वातावरणमा स्ववियु निर्वाचन गर्ने प्रतिबद्धता नआएसम्मका लागि तालाबन्दी गरिएको जनाएका छन् ।
