निष्पक्ष र विश्वसनीय खबरको सँगालो 
Khabar Punja
१९ चैत्र २०८१, बिहीबार
दमौली । नेकपा एमाले बन्दीपुर गाउँ कमिटीले वडा नम्बर ६ का सचिव नविन भुषालमाथि भएको कुटपिट र त्यसपछि उत्पन्न परिस्थितिलाई समन्वयकारी भूमिका खेल्न सरोकारवाला निकायलाई आग्रह गरेको छ ।
हाल सो घटनाको कानुनी प्रक्रिया अगाडि बढिसकेकाले परिस्थितिजन्य कारणले घटित यो घटनालाई विधिसम्मत रूपमा समाधान गर्दै राष्ट्रसेवक कर्मचारी र जनप्रतिनिधिबीच आपसी समझदारी, सहकार्य र सौहार्दपूर्ण सम्बन्धलाई बलियो बनाउन आवश्यक देखिएको एमालेको भनाइ छ।
गाउँ कमिटीका अध्यक्ष रवि श्रेष्ठले बिहीबार प्रेस विज्ञप्ती जारी गरी सेवाप्रवाहलाई सहज, प्रभावकारी र जनमुखी बनाउन कर्मचारी र जनप्रतिनिधिबीचको सम्बन्ध सुमधुर हुनुपर्दछ भन्ने स्पष्ट धारणा रहेको उल्लेख गरेका छन् ।
विज्ञप्तीमा भनिएको छ, ‘बन्दीपुर गाउँपालिका वडा नं.६ का वडा सचिव नविन भुसालमाथि कार्यस्थलमै भएकी कुटपिट घटना प्रति नेकपा (एमाले) बन्दीपुर गाउँ कमिटी गम्भीर ध्यानाकर्षण व्यक्त गर्दछ। यो घटनाले कर्मचारी सुरक्षासँगै स्थानीय सेवा प्रवाहमा प्रत्यक्ष असर पुऱ्याएको छ, जसका कारण नागरिकहरू आवश्यक सेवा लिन नपाएर निराश भएका छन्।’
यही घटनाका कारण गाउँपालिकामा कार्यरत कर्मचारीहरुले अत्यावश्यक बाहेकका सेवाप्रवाह पूर्ण रुपमा बन्द गर्दा बन्दीपुर अस्पताल, धरमपानी स्वास्थ्य चौकी, वडा कार्यालय तथा गाउँपालिकाका विभिन्न सेवा केन्द्रहरूबाट प्रवाह हुने सेवा अवरुद्ध हुँदा सर्वसाधारण नागरिकहरू ठूलो समस्यामा परेको उल्लेख गरिएको छ।
बिरामीहरू समयमै उपचार सेवा लिन नपाउनु, ज्येष्ठ नागरिक तथा अपाङ्गता भएका व्यक्तिहरू सामाजिक सुरक्षा सम्बन्धी सेवा लिन नपाएर फर्किनु, अन्य नागरिक प्रशासनिक सेवा नपाएर हैरान हुनु दुःखद र अस्वीकार्य अवस्था भएको जनाउँदै यस घटनालाई लिएर कुनै पनि पक्षबीच कटुता उत्पन्न हुनु भन्दा कानुनी प्रक्रियाबाट निष्पक्ष समाधान खोज्नुपर्ने तथा अवरुद्ध सेवा प्रवाहलाई तत्काल पुनः सञ्चालन गरी नागरिकहरूको असुविधा न्यून गर्न सरोकारवाला निकायहरूलाई अपिल गरिएको छ।
