निष्पक्ष र विश्वसनीय खबरको सँगालो 
Khabar Punja
१९ चैत्र २०८१, बिहीबार
दमौली, १८ चैत । नेपाल कम्युनिष्ट पार्टी (एमाले) का गण्डकी प्रदेश इन्चार्ज एवं स्थायी कमिटी सदस्य किरण गुरुङले नेपालमा राजतन्त्र फर्किने सम्भावना नरहेको बताएका छन् । सङ्घीय लोकतान्त्रिक गणतन्त्रको पक्षमा एमाले तनहुँले सोमबार दमौलीमा आयोजना गरेको जनजागरण सभालाई सम्बोधन गर्दै गुरुङले प्रतिगामी तत्वहरुले टाउको उठाउन खोजेको भन्दै त्यस्ता विरुद्ध सबै एकजुट हुनुपर्ने उल्लेख गरे ।
गुरुङले भने, “प्रतिगामीले टाउको उठाउने प्रयास गरेका छन् । त्यस्तालाई टाउको उठाउन दिनुहुँदैन । हामी सबै गणतन्त्रवादी एकजुट भएर प्रतिगामीको विरुद्ध लडौ ।” नेता गुरुङले आफ्नो वंश बचाउन नसक्नेले देशको संरक्षण गर्न नसक्ने भन्दै लुटपाट र हिंसाका घटना घटाउँछु भन्ने सपना नदेख्न चेतावनी दिए ।
बैङ्क ठगीमा लागेकाहरुको नेतृत्वमा राजतन्त्र फर्काउँछु भन्नु बालुवामा पानी हाले जस्तो भएको गुरुङको टिप्पणी थियो । राजाको शासन भएको बेला राजाले अवसर सदुपयोग गर्न नसकेको आरोप लगाउँदै गुरुङले वर्तमान व्यवस्था मानेर राजनीति गर्न आग्रह गरे ।
उनले भने, “राजालाई शासन गर्न मन लागेको भए राजनीतिक दल खोलेर चुनावमा आए हुन्छ । सभा सम्मेलन गर्न खुल्ला छ । लोकतान्त्रिक गणतन्त्र व्यवस्था मानेर आए राष्ट्रपति प्रधानमन्त्री बन्न पाइन्छ ।”
नेकपा (एमाले) का पोलिटव्युरो सदस्य टुकराज सिग्देलले ठूलो त्याग र समर्पणबाट गणतन्त्र आएकाले गणतन्त्र मास्छु भनेर सपना नदेख्न विरोधीलाई चेतावनी दिए । राजतन्त्रको समयमा भन्दा गणतन्त्र आएपछि नेपालमा धेरै विकास भएको उनको भनाइ थियो ।
