Khabar Punja

दमौली, २१ माघ । तनहुँको ऋषिङ गाउँपालिका–३ दाङश्रीस्थित भित्री सडकखण्डमा ट्याक्टरबाट खसेर मङ्गलबार राति एक जनाको मृत्यु भएको छ । मृत्यु हुनेमा ऋषिङ गाउँपालिका–४ बस्ने २३ वर्षीय पूर्णबहादुर थापा रहेको जिल्ला प्रहरी कार्यालय तनहुँले जनाएको छ ।

मधुवनस्थित कालीगण्डकी किनारबाट बालुवा बोकेर काफलडाँडा जाँदै गरेको ग १ त ६२९४ नम्बरको ट्याक्टरबाट खस्दा घाइते थापाको रत्नहरि अस्पतालमा राति ९ः४५ बजे मृत्यु भएको प्रहरी नायब उपरिक्षक श्रवणकुमार विकले जानकारी दिए ।

घाइतेको टाउको, छाती र खुट्टामा चोट लागेको थियो । मृतकको शव शल्यक्रियाका लागि प्रदेश अस्पताल दमौलीमा राखिएको छ । ट्याक्टर चालक र साहुलाई प्रहरीले नियन्त्रणमा लिएको छ ।