निष्पक्ष र विश्वसनीय खबरको सँगालो 
Khabar Punja
२५ बैशाख २०८३, शनिबार
दमौली, १९ वैशाख । सामाजिक सञ्जाल टिकटकमा सार्वजनिक भएको एक भिडियोका आधारमा तनहुँमा जातीय भेदभाव तथा छुवाछुतसम्बन्धी कसुरमा उजुरी परेपछि एक जना पक्राउ परेका छन् ।
म्याग्दे गाउँपालिका–१ का मिनबहादुर चंदारो, व्यास नगरपालिका–१३ का विश्व बुडा परियार र व्यास–१ का विनु विश्वकर्माले संयुक्त रूपमा जिल्ला प्रहरी कार्यालय तनहुँमा निवेदन दर्ता गराएका थिए ।
उक्त घटनाको आरोपमा अशोकप्रसाद डौलियालाई प्रहरीले नियन्त्रणमा लिएको छ ।
निवेदन अनुसार “दिपिका” र “ब्रदर्श डटकम” टिकटक एकाउन्टमार्फत सार्वजनिक भिडियोमा ब्रदर्श डटकमका सञ्चालक अशोकप्रसाद डौलियाले ग्राहकसँग जातीय भेदभाव झल्किने व्यवहार गरेको आरोप लगाइएको छ ।
निवेदनमा जनाइए अनुसार चटपटको स्वादप्रति असन्तुष्टि व्यक्त गरेपछि ती ग्राहकहरूप्रति अपमानजनक व्यवहार गरिएको र ‘दमै, कामी, सार्की’ जस्ता शब्द प्रयोग गरिएको दाबी गरिएको छ। साथै, सामाजिक सद्भाव खल्बलिने खालका अभिव्यक्ति दिएको भन्दै निवेदकहरूले गम्भीर आपत्ति जनाएका छन् ।
