निष्पक्ष र विश्वसनीय खबरको सँगालो 
Khabar Punja
१५ भाद्र २०८३, मंगलवार
दमौली, १५ भदौ । रसुवा लगायतका क्षेत्रमा आएको विनाशकारी बाढीबाट तनहुँको ऑबुखैरेनी र देवघाटस्थित त्रिशुली नदीमा फेला परेका १५ वटा शवको सोमबार अस्थायी व्यवस्थापन गरिएको छ । जिल्ला विपद् व्यवस्थापन समितिले व्यास नगरपालिका–५ स्थित चैनपुर जङ्गल क्षेत्रमा उक्त शवको व्यवस्थापन गरेको हो ।
तनहुँ क्षेत्रमा ३८ शव भेटिएकामा २३ वटा शव पोखरा पठाइएको थियो । प्रदेश अस्पताल दमौलीमा रहेका १५ वटा शवलाई व्यवस्थित किसिमले व्यवस्थापन गर्न पहिचान नभएका तथा बेबारिसे शव व्यवस्थापन कार्यविधि २०८३ बमोजिम जिल्ला विपद् व्यवस्थापन समिति, शव व्यवस्थापन समिति र विपद् प्राधिकरणको निर्णय अनुसार जङ्गल क्षेत्रमा शव व्यवस्थापन गरिएको प्रमुख जिल्ला अधिकारी शिवलाल तिवारीले जानकारी दिए ।
प्रदेश अस्पताल दमौलीले शवको फोटो, भिडियो खिच्ने, डिएनए सङ्कलन, शवमा कुनै पहिचान भएको खण्डमा त्यस्ता पहिचान सुरक्षित गरेर राखेको प्रजिअ तिवारीले बताए । शवको पहिचान गर्न प्रत्येक शवको माथि ट्याग राखिएको छ । आफन्तले डिएनन मिलेको खण्डमा शव झिकेर लैजान सक्ने प्रजिअ तिवारीले उल्लेख गरे ।
बाढीका कारण ज्यान गुमाएका तथा हालसम्म पहिचान हुन नसकेका शवहरूको भविष्यमा समेत पहिचान गर्न सकिने गरी आवश्यक विवरण र नमुना सुरक्षित राखिएको छ ।
शव व्यवस्थापनका लागि आज बिहानै व्यास नगरपालिकाको सहयोगमा त्यहाँ जाने बाटो खनिएको थियो भने खाल्डा खन्ने काम गरिएको थियो ।
