Khabar Punja

तनहुँ : तनहुँको म्याग्दे गाउँपालिका–४ स्थित आदर्श नमूना क्लवको आयोजनामा फागुन २४ गतेदेखि नवौ आदर्श तथा चौथो तारा स्मृति कप सेभेन ए साइड फुटबल प्रतियोगिता आयोजना गर्ने भएको छ । ‘युवाको कामना सकारात्मक परिवर्तनमा आदर्श नमूना’ भन्ने उद्देश्य अनुरुप क्लवले एघारौ वार्षिकोत्सव तथा वरिष्ठ समाजसेवी स्वर्गीय ताराराज रानाको सम्झनामा फुटबल प्रतियोगिता आयोजना गर्न लागेको हो ।

आदर्श तारा मनहरी खेलमैदानमा फागुन २९ गतेसम्म प्रतियोगिता सञ्चालन हुने क्लवका अध्यक्ष गौरवराज रानाले जानकारी दिनुभयो । प्रतियोगिताका विजेताले रु एक लाख एक र उपविजेताले रु ५० हजार एक नगद सहित ट्रफी, मेडल र प्रमाणपत्र प्राप्त गर्नेछन् । साथै उत्कृष्ट खेलाडी, सर्वाधिक गोलकर्ता, उत्कृष्ट गोलरक्षक र उत्कृष्ट डिफेन्डरलाई पुरस्कार प्रदान गरिनेछ । क्वाटरफाइनलदेखिको सम्पूर्ण खेलहरुमा म्यान अफ दि म्याच समेत प्रदान गरिने क्लवले जनाएको छ । प्रतियोगितामा सहभागिताका लागि क्लवले सबैलाई आग्रह गरेको छ ।