निष्पक्ष र विश्वसनीय खबरको सँगालो 
Khabar Punja
३० कार्तिक २०८१, शनिबार
बन्दिपुर : गत असार दोस्रो साता तनहुँको बन्दिपुर गाउँपालिका–२ खहरे खोलामा आएको बाढीले त्यहाँका १३ घर पूर्ण क्षति भयो । ९ घर आंशिक क्षति हुँदा २६ घर उच्च जोखिममा परे । हिउँदमा पानी सुक्ने खहरे खोलामा आएको बाढीले यहाँका स्थानीयवासीलाई घरवारविहिन बनायो ।
सोही खहरेखोलाबाट बस्ती जोगाउन नेकपा माओवादी केन्द्रको युवा सङ्गठन वाइसिएल तनहुँले तटबन्धनका लागि बिहीबार श्रम शिविर सञ्चालन गरेको छ । खहरे खोलामा तटबन्धनका लागि वाइसिएलका कार्यकर्ता श्रमदानमा खटिएको वाइसिएल नेपालका केन्द्रीय सदस्य एवं तनहुँ अध्यक्ष इश्वर बस्यालले जानकारी दिए । उनका अनुसार श्रम शिविर शुक्रबारसम्म सञ्चालन हुनेछ ।
उक्त श्रम शिविरको नेकपा माओवादी केन्द्रका केन्द्रीय सदस्य एवं पूर्वमन्त्री हरिबहादुर चुमानले शुभारम्भ गरेका थिए । श्रमशिविरमा बन्दिपुर गाउँपालिकाका अध्यक्ष पूर्णसिं थापा, नेकपा माओवादी केन्द्र प्रदेश कमिटी सदस्य हेमराज लामिछाने लगायत सहभागी भएका थिए ।
सर्वाधिकार सुरक्षित नोट : यस अनलाइनमा सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘खबरपुञ्ज डटकम’बाट प्रेषित समाचार बिनाअनुमति प्रयाेग नगर्न सूचित गराइन्छ ।
