निष्पक्ष र विश्वसनीय खबरको सँगालो 
Khabar Punja
२७ पुष २०८१, आईतवार
काठमाडौ । कांग्रेसको निर्वाचन प्रक्रियामा सहभागी नभएका वरिष्ठ नेता रामचन्द्र पौडेलले महाधिवेशन प्रतिनिधिहरुका लागि चियापान कार्यक्रम आयोजना गरेका छन्।
लैनचौर बान्क्वेटमा मंगलबार बिहान आयोजित चियापान कार्यक्रममा सम्बोधन गर्न मञ्चमा उक्लिएका उनी बीचमै हिँड्नुपरेको छ।
सभापतिका लागि चुनाव दोस्रो चरणमा पुगेपछि महाधिवेशन प्रतिनिधिले शेरबहादुर देउवा या शेखर कोइरालामध्ये एक रोज्न चर्को दबाब दिएका थिए।
हलमा उपस्थित महाधिवेशन प्रतिनिधिहरुले आफ्नै समूहका शेखरलाई पनि साथ नदिएको भन्दै आक्रोश पोखेका थिए।
तर उनी भने मञ्चमा आफूले राजनीतिक इमान र निष्ठा नछाड्ने भन्दै कसैलाई नसघाउने अडान लिइरहे।
उता फ्लोरमा उपस्थित महाधिवेशन प्रतिनिधिहरुको आक्रोश बढ्दै गएको थियो। त्यसपछि केही महाधिवेशन प्रतिनिधिहरू मञ्चमै उक्लिएर पौडेललाई दबाब दिएका थिए।
आक्रोशित महाधिवेशन प्रतिनिधिहरू पौडेलको मौनताविरुद्ध मञ्चमै उक्लिएर नाराबाजी गरेपछि पौडेललाई उनका सहयोगी र सुरक्षाकर्मीले त्यहाँबाट जोगाउँदै लगेका छन्।
महाधिवेशनको मतदानमा पनि सहभागी नभएका पौडेलसँग इतर समूहका नेता कार्यकर्ता आक्रोशित छन्।
कांग्रेसको संस्थापन इतर समूहमा सहमति नभएपछि सभापतिको दौडबाट बाहिरिएर घरमै बसेका उनी कुनै समूहमा खुलेनन्।
कुनै समूहमा नखुलेका उनी सोमबारको मतदान प्रक्रियामा सहभागी भएनन्। पौडेलले सभापतिका उम्मेदवार शेखर कोइरालालाई समर्थन हुने बताए पनि खुलेर भोट मागेर सघाउन निस्किएनन्। (नेपालखबरबाट)
