Khabar Punja

दमौली, १ वैशाख । नयाँ वर्षको अवसरमा व्यास नगरपालिका–१४ स्थित प्रसिद्ध छाब्दीवाराही मन्दिरमा आज पूजाआजाका लागि भक्तजनको घुइँचो लागेको छ । बिहानैदेखि मन्दिरमा देशका विभिन्न ठाउँबाट भक्तजन आएका हुन् ।

मनले चिताएको पूरा हुने धार्मिक विश्वासका साथ यहाँ विभिन्न जिल्लाबाट भक्तजन आएको स्थानीय युवा अविनाश पन्थले जानकारी दिए। भक्तजनका भीडका कारण यहाँका स्वयंसेवकले लाइन व्यवस्थापनमा सघाएका छन् ।

यहाँ वार्षिक ६÷७ लाख भक्तजन आउने गरेको छाब्दी वाराही विकास कोषका अध्यक्ष प्रेमबहादुर थापाले जानकारी दिए।

सदरमुकाम दमौलीबाट सात किलोमिटर पक्की सडक यात्रा गरेपछि मन्दिर पुगिन्छ । मन्दिर गत वर्षमात्रै पुनर्निर्माण गरी आकर्षक बनाइएको छ । गण्डकी प्रदेश सरकारको रु २४ लाख आर्थिक सहयोग र छाब्दीवाराही विकास कोषको आन्तरिक कोष रु ४६ लाख गरी रु ७० लाखको लागतमा मन्दिरको पुनर्निर्माण गरिएको छ । छाब्दी वाराही मन्दिरमा शनिबारमात्रै करिब पाँच हजार भक्तजनले पूजाआजा गर्ने गरेका छन् । दसैं तिहारका बेला मन्दिरमा भक्तजनको उल्लेख्य उपस्थिति रहने गरेको छ ।