निष्पक्ष र विश्वसनीय खबरको सँगालो 
Khabar Punja
५ श्रावण २०८३, बुधबार
काठमाडौ, ६ साउन । अर्जेन्टिनाका कप्तान लियोनेल मेसी सन् २०२६ को पुरुष विश्वकपको सर्वोत्कृष्ट खेलाडी घोषित भएका छन्। ‘इन्टरनेसनल फेडरेसन अफ फुटबल हिस्ट्री एन्ड स्ट्याटिस्टिक्स’ (IFFHS)ले मेसीलाई विश्वकपको सबैभन्दा प्रतिष्ठित व्यक्तिगत सम्मान ‘आईएफएफएचएस बेस्ट प्लेयर’ प्रदान गरेको हो।
संस्थाका अनुसार यो उपाधि खेलाडीको समग्र प्रदर्शन सूचकांकका आधारमा तय गरिएको हो । जसमा खेलको समय, गोल, एसिस्ट र नकआउट चरणमा परेको प्रभावलाई डाटामा आधारित कडा मापदण्डबाट विश्लेषण गरिएको थियो ।
मेसीले अर्जेन्टिनाको विश्वकप यात्राका क्रममा सबै ७ खेल खेल्दै कुल ६२६ मिनेट मैदानमा बिताएका थिए। यस अवधिमा उनले ८ गोल गर्नुका साथै ४ वटा गोलका लागि पास (एसिस्ट) मिलाएका थिए।
कुल १२ गोलमा प्रत्यक्ष योगदान पुर्याएका मेसीको औसत म्याच रेटिङ ८.३३ रहेको थियो। समूह चरणदेखि फाइनलसम्म नै उनको निरन्तरको उत्कृष्ट प्रदर्शनका कारण उनी यो उपाधिका लागि हकदार बनेका हुन्।
आईएफएफएचएसले विशेष गरी नकआउट चरणमा देखाएको निर्णायक खेललाई बढी भार दिएर मूल्यांकन गरेको जनाएको छ। तथ्यांकीयय प्रमाण र प्रदर्शनको निष्पक्ष रेकर्डका आधारमा मेसी अन्य सबै खेलाडीभन्दा उत्कृष्ट साबित भएको संस्थाले स्पष्ट पारेको छ।
